Urukiko rukuru rwo mu gihugu cya Uganda rwategetse ko abasirikare n’abapolisi bava ku rugo rw’ukuriye ishyaka NUP ritavugarumwe n’ubutegetsi, Robert Kyagulanyi uzwi kandi nka Bobi Wine.
Iminsi yari ibaye myinshi Bobi Wine n’umugore we bafungiye mu rugo rwabo kuva amatora yabaye tariki 14 z’uku kwezi kwa mbere yarangira.
Nkuko ibitangazamakuru byo mu gihugu cya Uganda ribivuga, mu cyumweru gishize, abanyamategeko bahagarariye uyu munyapolitiki wahoze ari munyamuziki batanze ikirego baregera urukiko gufungwa kwa Bobi Wine. Leta ivuga ko kumufungira iwe ari igikorwa cyari kigamije kumubuza gutegura imyigaragambyo yamagana ibyavuye mu matora, kuko Bobi Wine avuga ko ayo matora yibwe.
Muri ayo matora, Perezida Yoweri Museveni yatsindiye manda ya gatandatu ku majwi hafi 59%, mu gihe Robert Kyagulanyi bari bahatanye cyane yagize hafi 35%. Urukiko rukuru rwavuze ko gufungira Kyagulanyi iwe mu rugo ari igikorwa kinyuranyije n’amategeko.
Ntibizwi neza niba icyemezo cy’uru rukiko kiraza guhita gikurikizwa. Gusa ibihugu, imiryango yigenga n’abantu ku giti cyabo, banenze bikomeye ko amatora muri Uganda yaranzwe no gupyinagaza no kwica abatavugarumwe n’ubutegetsi bwariho, bamagana n’ifungwa rya Bobi Wineryakorewe iwe mu rugo.
Umuryango w’ubumwe bwa Africa wavuze ko amatora muri Uganda yagenze neza kandi yabaye mu mahoro asesuye. Nyuma y’aya matora yakurikiwe n’ifungwa rya Bobi Wine ( wafungiwe mu rugo rwe), uyu muhanzi yiyambaje umuryango w’abibumbye UN awusaba kumurenganura haba ku gufungwa kwe ndetse no kwibwa amajwi.
Mporebuke Noel
