Covi-19: Ghana nicyo gihugu cya mbere cyakiriye inkingo muri gahunda ya Covax

Igihugu cya Ghana cyakiriye doze 600,000 z’urukingo rwa AstraZeneca z’umugambi wa Covax ugamije kugeza inkingo kuri benshi ku isi. Ni cyo gihugu cya mbere ku isi kigezweho n’inkingo za Covax, nk’uko bitangazwa na OMS na UNICEF byafashije kugezayo izo nkingo.

Ibindi bihugu bitandukanye bya Africa bitegereje kugerwaho n’izi nkingo muri izi mpera z’ukwezi kwa kabiri.

Uhagarariye ishami ry’umuryango w’abibumbye ryita ku buzima OMS/WHO muri Ghana mu itangazo yasohoye, yavuze ko izi nkingo zihawe Ghana ari icyiciro cya mbere cy’inkingo za Covid-19 zigiye koherezwa mu bihugu bikennye n’iby’ubukungu buciriritse.

Nkuko ikinyamakuru Theheritagetimes cyo muri  Ghana cyabyanditse, abantu barenga 80,700 banduye Covid-19 naho abarenga 580 imaze kubica. Inkingo zahawe Ghana zatubuwe na Serum Institute of India ihawe uburenganzira na AstraZeneca/Oxford bakoze uru rukingo.

Itangazo ryashyizwe ahagaragara na minisiteri y’itangazamakuru ya Ghana rivuga ko izi nkingo zakorewe mu Buhinde zizaterwa abantu mu byiciro.

Bamwe mu bazaherwaho harimo; abakora mu nzego z’ubuzima, abarengeje imyaka 60, abategetsi bari kurwanya iki cyorezo, abadepite, abacamanza, abashinzwe umutekano, bamwe mu bayobozi b’amadini, abarimu, nk’uko iyo minisiteri ibivuga.

Covax ni umugambi uhuriyemo ibihugu hafi 100, byahuje ubushobozi bigamije kugura inkingo zo guha cyane cyane ibihugu by’amikoro macye bidashoboye guhangana n’ibikize ku isoko ry’urukingo ku isi.

Mporebuke Noel

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *