Manchester City yegukanye igikombe cya gatatu cya Premier League mu myaka ine ishize nyuma yuko mucyeba Manchester United bagihataniraga bya hafi atsinzwe na Leicester City.
Man City y’umutoza Pep Guardiola ubu ifite amanota 80, irarusha amanota 10 United iri ku mwanya wa kabiri, isigaje imikino itatu.
Bubaye ubwa karindwi City yegukanye iki gikombe cya shampiyona, kikaba ari n’icya gatanu mu myaka icyenda ishize.
Guardiola yagize ati: “Uyu wabaye umwaka utandukanye n’indi ndetse n’igikombe cya Premier League gitandukanye n’ibindi”.
“Uyu ni wo mwaka watugoye cyane. Tuzahora iteka twibuka uyu mwaka kubera uburyo twatsinzemo. Ntewe ishema ryinshi no kuba umutoza hano ndetse n’iri tsinda ry’abakinnyi”.
“Barihariye cyane. Kunyura muri uyu mwaka, harimo n’ibibujijwe byose n’ibibazo twahuye nabyo – bakagaragaza gukomeza urwego rwabo rw’imikinire dufite, ni ibintu bidasanzwe. Ni ukudacogora”.
Yongeyeho ati: “Buri munsi, baba bahari, bahatanira intsinzi, iteka bagerageza gukina neza kurushaho. Bagaragaje kwihangana gukomeye”.
“Nabaye muri Espagne, nabaye mu Budage, none nshobora kuvuga ko iyi ari yo shampiyona ya mbere igoye cyane, ni ko navuga kugeza ubu. Rero bivuze ikintu kinini kuri buri wese”.
Guardiola, w’imyaka 50, ubu amaze kwegukana ibikombe umunani mu Bwongereza kuva yagera i Manchester mu 2016.
Ku wa gatandatu ushize, City yari ifite amahirwe yo kwegukana iki gikombe icyo gihe, ariko itsindirwa ku kibuga cyayo cya Etihad na Chelsea 2-1.
Ariko, Leicester yasoje akazi kose ka Man City ubwo ku wa kabiri yatsindaga Manchester United 2-1 ku kibuga cy’iyi kipe cya Old Trafford.
https://twitter.com/aguerosergiokun?ref_src=twsrc%5Etfw%7Ctwcamp%5Etweetembed%7Ctwterm%5E1392200022113103874%7Ctwgr%5E%7Ctwcon%5Es1_&ref_url=https%3A%2F%2Fwww.bbc.com%2Fgahuza%2Fimikino-57083023
Iyi ibaye inshuro ya gatandatu uwegukanye Premier League amenyekanira ku kibuga Old Trafford – inshuro nyinshi kurusha ku kindi kibuga icyo ari cyo cyose, eshatu muri izo nshuro zabaye cyegukanwa n’andi makipe.
Iki kandi ni igikombe cya kabiri City yegukanye mu byumweru birenga gato bibiri bishize, nyuma yo gutsinda Tottenham ikegukana igikombe cya Carabao Cup.
Iyi City bwa mbere yanageze ku mukino wa nyuma wa Champions League isezereye Paris St-Germain mu cyumweru gishize.
Kuva mu kwezi kwa cyenda mu 2008 ubwo yagurwaga n’ikigo Abu Dhabi Group cy’abaherwe bo muri Emira Zunze Ubumwe z’Abarabu (UAE), City imaze gutwara ibikombe 12, kandi uyu ni umwaka wa gatatu yegukanyemo icyarimwe shampiyona na Carabao Cup.
Biteganyijwe ko ishyikirizwa igikombe cya Premier League ku itariki ya 23 y’uku kwezi kwa gatanu, nyuma y’umukino wayo wa nyuma wa shampiyona y’uyu mwaka uzayihuza na Everton.
Ku kibuga hazaba hari abafana bagera ku 10,000, bijyanye n’icyemezo giherutse gufatwa mu Bwongereza cyo gukuraho ibindi byari bibujijwe nk’ingamba yo kwirinda coronavirus.
