Muri USA ibyari amatora byahinduye isura, Biden na Trump rurageretse

Abafite amaduka mu mijyi itandukanye y’Amerika barimo gushyira imbaho inyuma y’amadirishya bitegura ko hashobora kuba imidugararo nyuma y’amatora.

Donald Trump na Joe Biden

Ibi bibaye hashize amezi macye ibikorwa by’ubucuruzi byinshi bisahuwe mu myigaragambyo yabayemo urugomo yakurikiye iyicwa ry’Umunyamerika w’umwirabura George Floyd wapfiriye mu maboko ya polisi mu kwezi kwa gatanu.

 

Mbiri mbiri hagati ya Trump na Biden Joe

 

Muri aya matora atararangira, Umukandida w’Abademokarate Joe Biden imibare yerekanye ko yizeye gutsinda muri leta ya Michigan, aho Biden yahise avuga ko nta kabuza bazatsinda.

 

Donald Trump yatangije intambara y’amategeko aregera inkiko muri leta enye ngo zihagarike kubara amajwi kuko birimo uburiganya, gusa nta bimenyetso aragaragaza bihamya ibyo.

Ikizere cya Trump muri Pennsylvania cyagabanutse

Imibare iheruka muri iyi leta irerekana ko uburyo Donald Trump ejo yari ari imbere muri Pennsylvania, leta y’isibaniro ry’amatora, byagabanutse.

 

Kugeza saa tatu n’igice z’umugoroba tariki ya 5 Ugushyingo 2020, kuri 90% y’amajwi yari amaze kubarwa Trump yari imbere ya Joe Biden ho amajwi 111,400.

Mu gihe kuwa gatatu nimugoroba Trump yari imbere ya Biden ho amajwi 379,639

 

Pennsylvania igira amajwi 20 ya ‘electoral college’, ibi bituma ihinduka leta ikomeye muri aya matora. Iyi leta yatoye Abademokarate inshuro esheshatu ziheruka mbere y’uko mu 2016 ihindura igatora Trump.

 

Trump nyuma y’inkiko yiyambaje amasengesho

Paula White-Cain, Umuvugabutumwa akaba n’umujyanama mu by’ukwemera wa Perezida Donald Trump, yayoboye amasengesho akomeye yo gutakambira Imana ngo Trump yongere atorwe.

 

Mu gusenga kwe yibanze kucyo yise amatsinda ya sekibi ari kugerageza kwiba amajwi ya Trump. Binyuze muri video ngufi ya Madamu Paula ari gusenga yakwiriye henshi ku mbuga nkoranyambaga muri iki gihe abantu bategereje ibiva muri leta zikiri kubara amajwi.

 

Muri sena no mu badepite ho byifashe bite?

Nubwo umwanya wa perezida ugihatanirwa, ariko imyanya myinshi mu mutwe w’abadepite n’uwa sena yamaze kubona beneyo, kandi nta cyahindutse gifatika kuko abarepubulikani bakiyoboye.

 

Mugihe abademokarate bifuzaga ubwiganze muri Sena, bashakaga nibura kwambura imyanya ine Abarepubulikani, ariko ubu bisa n’aho babashije gufatamo umwe wonyine.

Mu mutwe w’abadepite naho urebye nta cyahindutse cyane, kuko abademokarate bagumanye ubwiganze, mugihe abarepubulikani nta mwanya n’umwe mushya bahabonye.

 

Kugeza ubu amaso menshi ahanzwe leta ya Nevada, ifite amajwi atandatu y’intumwa zitora, nubwo hano imibare ya Trump na Biden iregeranye cyane. Abategeka iyi leta bavuze ko andi majwi ava muri Nevada atangazwa uyu munsi kuwa kane saa mbiri z’ijoro ku masaha yo mu Burundi no mu Rwanda.

 

Ku majwi 85% amaze kubarwa, imibare ya ABC News rerekana ko Biden ari imbere ya Trump ho amajwi 11,438 gusa.

 

Biden yavuze ko afite amajwi atarigeze abonwa n’undi mukandida

Umukandida Joe Biden yavuze ijambo ryumvikanamo kwigirira icyizere, ati: “Ntabwo nje kuvuga ko natsinze amatora. Ariko ndi hano ngo mbabwire ko kubara nibirangira, twizeye ko tuba twatsinze“.

Hari leta nyinshi zikiri kubara, gusa Biden yavuze ko yamaze kubona amajwi atarigeze abonwa n’undi mukandida uwo ariwe wese mu matora nk’aya.

 

Uwahoze ari Perezida Barack Obama niwe wari ufite umuhigo w’amajwi menshi ya rubanda – mu 2008 yatowe yagize amajwi miliyoni 69.5

 

Kugeza ubu ninde uri imbere mu majwi rusange avuga iki?

Joe Biden umukandida w’ishyaka ry’abademocrate amaze kugira amanota 264 , 50.4%, 72,489,027 mu gihe Donald Trump w’ishyaka ry’abarepubulika 214, 47.9%, 68,928,031

Gusa muri Amerika amajwi ya rubanda siyo yemeza uwatsinze, ahubwo amajwi agenerwa buri leta, yose hamwe akaba ari 538, utsinda ni ugira 270.

 

Mporebuke Noel

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *