UK: Umuntu wa mbere uhawe urukingo rwa Covid-19, ni umukecuru w’imyaka 90

Umukecuru w’imyaka 90 yabaye umuntu wa mbere uhawe urukingo rwa Covid-19, mu gikorwa cy’ikingira kirimo gutangizwa mu Bwongereza.

Umukecuru w’imyaka 90, Margaret Keenan niwe muntu wa mbere uhawe urukingo rwa Covid-19 (Photo BBC)

Margaret Keenan, uzuzuza imyaka 91 mu cyumweru gitaha, yavuze ko iyi ari yo “mpano nziza cyane ije mbere y’igihe cy’umunsi mukuru w’amavuko” ye. Yatewe urushinge ku isaha ya 06:31 GMT, ni ukuvuga saa mbili n’iminota 31 mu Rwanda no mu Burundi.

Urukingo yahawe ni rumwe muri doze 800,000 z’urukingo rw’ibigo Pfizer na BioNTech zigiye gutangwa mu Bwongereza mu byumweru biri imbere. Byitezwe ko izindi doze zigera kuri miliyoni enye zizaba zageze mu Bwongereza mu mpera y’uku kwezi.

Inkuru dukesha BBC ivuga ko ahantu hatoranyijwe ho gutangira urwo rukingo hazakingirirwa abarengeje imyaka 80 ndetse na bamwe mu baganga n’abita ku bageze mu zabukuru. Ibitaro bigera hafi kuri 70 mu gihugu hose birimo kwitegura gutanga uru rukingo muri iki cyumweru.

Ngo iyi gahunda igamije kurinda abafite ibyago byinshi byo kwandura Covid-19 ndetse no gutuma ubuzima busubira kuba ubusanzwe, nka mbere yuko Covid-19 yaduka. May Parsons ukuriye ikigo cyita ku bageze mu bazukuru ni we wakingiye Madamu Keenan ku bitaro bya Kaminuza byo mu mujyi wa Coventry.

Uyu mukecuru Keenan yagize ati: “Ndumva nitaweho cyane kuba mbaye umuntu wa mbere ukingiwe Covid-19, ni yo mpano nziza cyane ije mbere y’igihe cy’umunsi mukuru w’amavuko nashoboraga kwifuza guhabwa.”

Yongeyeho ko adashobora kubona uko ashimira abakozi b’ikigo cy’ubuzima cy’Ubwongereza bamwitayeho cyane, agashishikariza n’abandi gufata uru rukingo.

Ubwongereza ni cyo gihugu cya mbere ku isi gitangiye gutanga urukingo rwa Pfizer nyuma yuko mu cyumweru gishize abagenzuzi b’imiti bo muri icyo gihugu bemeje ko rutangira gukoreshwa.

Umunyamabanga wa leta y’Ubwongereza ushinzwe ubuzima Matt Hancock yabwiye ikiganiro BBC Breakfast ati “Hari urugendo rurerure imbere yacu ariko ibi tuzabisohokamo neza”.

Mu ruzinduko rwe mu bitaro bya Guy’s Hospital mu murwa mukuru London, Minisitiri w’intebe Boris Johnson yavuganye na Lyn Wheeler w’imyaka 81, wabaye uwa mbere ukingiwe aho. Bwana Johnson yagize ati: “Ni ibintu bikora ku mutima cyane kumwumva avuga ko arimo kubikorera Ubwongereza, kandi ni byo koko – arimo kwirinda ariko arimo no gufasha mu kurinda igihugu cyose”.

Gusa hari bamwe muri leta y’Ubwongereza bavuze ko izindi doze miliyoni enye zagombye kuba zageze mu gihugu mu mpera y’uku kwezi.

Mu Bwongereza, abantu barenga miliyoni 1,7 banduye Covid-19, naho abarenga 61,000 muri bo yarabishe, nkuko imibare ya Kaminuza ya Johns Hopkins yo muri Amerika ibigaragaza.

Integonziza@gmail.com

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *