USA: Twitege iki ku iperereza ku matora ryatangiye guteza ibibazo?

William Barr Umushinjacyaha mukuru wa Amerika, ari nawe ukuriye ‘ministeri’ y’ubutabera ya Amerika, yasabye abashinjacyaha gukora iperereza ku nenge zivugwa mu matora ya perezida w’iki gihugu atarashyirwaho akadomo kugeza ubu.

 

Gutangira iri perereza byatumye ukuriye ibiro byo gukurikirana ibyaha mu matora muri minisiteri y’ubutabera ahita yegura kuko ibyo atabishyigikiye. Richard Pilger, niwe wari kuzaba akuriye iki gikorwa cyasabwe n’umushinjacyaha mukuru, yahise avuga ko yeguye kubera ibyasabwe na Bwana Barr.

 Iri perereza ubusanzwe rikorwa na buri leta ku bushake bwayo, ariko William Barr yavuze ko ibi atari itegeko rikomeye. Nubwo bimeze bityo, Bwana Barr yaburiye ko hadakwiye gukorwa iperereza mu gihe hari aho biboneka ko nta shingiro rihari ryo kurikora.

Trump wagaragaje impungenge ku matora bwa mbere avuga iki?

Nkuko BBC ibitangaza, Donald Trump arifuza ko kubara amajwi bisubirwamo muri Pennsylvania kugira ngo bibuze Joe Biden intsinzi muri iyi leta aho amajwi yayo 20 kuwa gatandatu yatumye arenza 270 aba akenewe.

Trump kuva amaze kubwirwa ko Joe Biden bigaragara ko  yatsinze amatora kugeza ubu ntarongera kuboneka mu ruhame, bikaba bivugwa yuko yibereye muri White house, inzu arimo gusezera kubamo bitarenze ukwezi kwa mbere.

Perezida Donald Trump yanze kwemera ibigaragazwa ko Joe Biden yatsinze amatora, ndetse yatangije ibirego mu mategeko ko habaye uburiganya. Ni umuco muri Amerika ko ibyavuye mu matora bivugwa n’ibinyamakuru bikomeye, uwatsinzwe akavuga ijambo ryemera ibyo.

Gusa mu buryo bw’amategeko, ibyavuye mu matora bya nyuma byemezwa n’inteko y’abatora (electoral college), ibyo biteganyijwe tariki 14 z’ukwezi gutaha muri buri leta.

Ese Abarepubulikani bashyigikiye Trump?

 Ukuriye abasenateri b’Abarepubulikani bafite ubwiganze muri sena ya Amerika, Mitchell McConnell yari ataragira icyo avuga kuva byavugwa ko Joe Biden yatsinze Donald Trump.

Bwana McConnell ubu noneho yavuze ko Perezida Trump ari uburenganzira bwe 100% kureba no kugaragaza inenge zabaye mu matora.

Yifashishije imbuga nkoranyambaga, Trump akomeza gutangaza, nta bimenyetso yerekana, ko amatora mu gihugu cye yaranzwe n’uburiganya. Mbere y’amatora, McConnell yabonekaga nk’utifatanyije cyane na Trump, aho yavuze ko mu bihe bishize atabaye umushyitsi kenshi muri White House.

Gusa hari abandi Barepubulikani, nk’uwahoze ari perezida George W Bush wavuze ko ibyavuye mu matora “biciye mu mucyo”, yemeza ko Biden yayatsinze.

Ingengabihe n’ibiteganyijwe bireba isozwa ry’amatora

  • Buri leta igomba kuba yarangije gusubiramo kubara no kwemeza ibyavuye mu matora tariki ya 08/12/2020.
  • Intumwa zitora zizahurira mu mirwa mikuru ya buri leta zitore perezida na visi perezida tariki ya 14/12/2020.
  • Inama y’imitwe yombi y’inteko, sena n’abadepite, ngo babare amajwi y’intumwa zatoye tariki ya 6/01/2021.
  • Kurahira kwa perezida mushya ni tariki ya 20/01/2021.

Kugeza ubu hari ama letaa akiri kubarura amajwi y’amatora harimo leta ya Georgia, Arizona, North Carolina na Alaska.

Mporebuke Noel

 

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *