Inteko ishingamategeko yatumije minisitiri w’ubutegetsi bw’Igihugu na Minisitiri w’ubucuruzi ngo basobanure ibibazo by’amabagiro atameze neza nk’uko byifuzwa.
Abagize inteko ishingamategeko bavuga ko bahangayikishijwe n’inyama abanyarwanda barya zitari ku rwego rwiza.
Muri raporo y’Umugenzuzi mukuru w’imari ya Leta ya 2021 na 2022 igaragaza ko mu mabagiro 25 bakoreye ubugenzuzi basanze nta bagiro na rimwe ryujuje ibisabwa.
Mu byo aya amabagiro atujuje harimo inyubako zitameze neza, ibikoresho, umubare ukenewe w’abakozi n’ibindi.
Komisiyo y’abadepite ishinzwe, ubutaka, ubuhinzi, ubworozi n’ibidukikije ivugako ibibazo biri mu mabagiro birimo n’umwanda bidindiza gahunda leta yihaye yo kuba abantu barya inyama zitunganyije neza.
Komisiyo yo munteko ishingamategeko ubwo yagezaga raporo yayo mu bagize inteko ishingamategeko yagize iti: “ Nyuma yo gusuzuma neza raporo y’umugenzuzi mukuru w’imari ya Leta, twasanze hari ibibazo byinshi mu mabagiro birimo amabagiro ari hagati mu baturage, amabagiro adafite ibyobo byo gutamo inyama zanduye n’ibindi.”
Ibindi bibazo biri mu mabagiro ni ibijyanye n’uko inyama zitwarwa zikuwe ku mabagiro zijyanywe aho zigurishirizwa muri (Butchery). Depite Kayumba, yabwiye abagize inteko ishingamategeko ko mu igenzura bakoze basanze abantu 15 kuri 25 batwara inyama badafite ibyangombwa bibemerera kuzitwara.
Iyi komisiyo kandi yasanze abanyarwanda benshi barya inyama zidapimwe kuko mu mabagiro 30 kuri 47 iyi komisiyo yasuye yasanze atagaragaza neza niba inyama zibagirwamo zipimwa.
Nyuma y’ibi byagaragajwe n’iyi komisiyo, abagize inteko ishingamategeko basanze ari ngombwa guhamagaza ba minisitiri babiri barimo ushinzwe ubucuruzi n’inganda n’uwubutegetsi bw’Igihugu ngo bayisobanurirre ibi bibazo. Gusa nta taliki iratangazwa y’igihe aba baminsitiri bazitabira iyi nteko.
