Nyuma yuko Perezida Trump yandye Covid-19, hakaba hokomeje kwiyongera abagaragarwaho n’iki cyorezo mu nzu y’umukuru wa leta zunze ubumwe za America, Joe Biden, umukandida perezida w’ishyaka ry’abademokarate, yavuze ko nta kiganiro mpaka kizakorwa Trump naba agifite Covid-19.
Ku wa kabiri tariki ya 06 Ukwakira 2020, Joe Biden yagize ati: “Ntekereza ko abaye agifite Covid, tudakwiye kugirana ikiganiro mpaka”. Kandi ati “Ntekereza ko tugomba gukurikiza amabwiriza akaze cyane yo kwirinda. Abantu benshi cyane baranduye kandi ni ikibazo gikomeye cyane”.
Umujyanama wa Trump mu bikorwa byo kwiyamamaza, Jenna Ellis, yabwiye BBC ko Perezida ameze neza cyane kandi yizeye ko azashobora kwitabira icyo kiganiro cya Kabiri. Madamu Ellis yabwiye ikiganiro Today cya BBC ko Perezida Trump afata iyi virusi nk’ikibazo gikomeye, ariko yongeraho ko badakwiye kubaho mu bwoba bw’iyi virusi.
Uyu mujyanama yanavuze ko umwanzuro wa nyuma uzafatwa hamaze kubazwa itsinda ry’abaganga ba perezida bo mu biro bya White House. Biteganyijwe ko ikiganiro mpaka cya kabiri kizaba ku itariki ya 15 y’uku kwezi kwa cumi mu mujyi wa Miami muri leta ya Florida.
Umukandida w’abarepubulikani Perezida Trump bamusanzemo Covid-19 ku itariki ya mbere y’uku kwezi kwa cumi. Ariko ntibizwi igihe yayanduriye cyangwa igihe yatangiye kumva atameze neza.
Amabwiriza y’urwego rw’ubuvuzi muri Amerika, Trump akwiye kuguma mu kato mu gihe cy’iminsi igera ku 10 ahereye igihe ibimenyetso bya mbere byayo byagaragariye.
Kugeza ubu muri Amerika abantu barenga miliyoni 7,7 bamaze gutangazwa ko banduye coronavirus, muri bo abarenga 216,000 yarabishe nkuko imibare ya Kaminuza ya Johns Hopkins ibigaragaza. Ibi bituma leta zunze ubumwe za America iza ku isinga mu kugira abanduye benshi ku isi.
Mporebuke Noel
