Ibirego biregerwa Inkiko mu Rwanda byariyongereye mu mwaka wa 2021-2022 cyane ibijyanye n’imanza z’ Inshinjabyaha n’imanza z’ubucuruzi ariko hagabanuka ibirego by’imanza za Jenoside n’ibyaha biyishamikiyeho kimwe n’ibirego by’imanza z’ubutegetsi.
Muri raporo y’Urukiko rw’ikirenga y’umwaka wa 2022 igaragaza ko mu myaka itatu ishize ibirego byinjiye mu nkiko byiyongereyeho 12% ugereranyije n’ibirego byinjiye kuva mu mwaka wi 2019-2020 kugeza muri 2020-2021.
Iyi raporo igaragaza ko ibirego bya Jenoside n’ibyaha biyishamikiyeho byagabanutse ku kigero cya 33% munsi ya zero kuko nko mu mwaka wa 2019-2020 hatanzwe bene ibi birego 622, mu mwaka wa kurikiyeho wa 2020-2021 hatanzwe ibirego 538 mu gihe mu mwaka ushize wa 2021-2022 hatanzwe ibirego bya Jenoside n’ibyaha biyishamikiyeho 416.
Ibindi birego byagabanutse ni ibirego bijyanye n’imanza z’ubutegetsi kuko nko mu mwaka wi 2019-2020, mu nkiko hatanzwemo ibirego 505 mu mwaka wa kurikiye wa 2020-2021, ibi birego mu nkiko byari 569 mu gihe mu mwaka ushize wa 2021-2022 ibirego bijyanye n’imanza z’ubutegetsi byagabanutse bigera kuri 413.
Ibindi birego byagabanutse ni bijyanye n’imanza z’umurimo byagabanutseho 9%, ibirego by’imanza zihariye byagabanutse kugera kuri 69% n’ibyaha bimunga ubukungu byagabanutse kugera kuri 2%.
Imanza z’ubucuruzi ni zo ziyongereye ku kigero kiri hejururu, kingana na 19%, zikurikirwa n’imanza nshinjabyaha zazamutse ku kigero cya 14%. Imanza mbonezamubano zo zazamutse ku kigero cya 9%, imanza zihariye zikaba arizo zagabanutse cyane, ku kigero cya 69%; iza Jenoside n’ibyaha biyishamikiyeho zigabanuka ku kigero cya 33%, mu gihe imanza z’ubutegetsi zagabanutse ku kigero cya 18%.
Ibirego 75,186 nibyo byakiriwe mu mwaka wi 2019-2020, mu gihe muri 2020-2021 ibirego byakiriwe mu nkiko byose ari 78,853, ibi birego byariyongereye bigera kuri 84,243 mu mwaka ushize wa 2021-2022.
