Umuhungu wa Perezida Yoweri Kaguta Museveni, Gen Muhoozi Kainerugaba, avuga ko ikintu kimwe yakora kigashimisha nyina umubyara ari ukuba Perezida w’Igihug cya Uganda kandi ko agomba kumuba nta kabuza.
Ibi uyu mu jenerali yabitangarije ku rubuga rwa twitter aho asanzwe acisha ubutumwa bwe.
Gen Muhoozi Kainerugaba atangaje ibi nyuma y’igihe gito azamuwe mu ntera akuwe ku ipeti rya Liyotona Jenerali agirwa Jenerali, ariko yamburwa inshingano yari afite zo gukurira abasirikare barwanira ku butaka b’iki Gihugu.
Kwamburwa inshingano kwa Gen Muhoozi byatewe n’amagambo yatangaje kuri Kenya avuga ko yayitera akayifata mu byumweru bitarenga bibiri. Aya magambo yateje impaka nyinshi bituma na Perezida Yoweri Museveni yandika asaba imbabazi abaturage ba Kenya.
Kuba Gen Muhoozi Kainerugaba yasimbura se ku mwanya wa Perezida w’Igihugu amaze kubitangaza inshuro nyinshi ariko kuri iyi nshuro nibwo abivuze nta guca ku ruhande n’ubwo benshi bari basanzwe bavuga ko ari umugambi wateguwe na Se w’igihe kirekire wiswe Muhoozi Project.
Yoweri Kaguta Museveni amaze imyaka 36 ku butegetsi kuko yabugiyeho mu mwaka wi 1986, ahiritse Obote.
