Iburanisha mu rubanza rwa Félicien Kabuga uregwa uruhare muri Jenoside yakorewe abatutsi ryakomeje kuri uyu wa kane, umwe mu bagize itsinda ry’inzobere zakoze raporo ku buzima bwe – ko butamwemerera “kwitabira urubanza rwe mu buryo bwa nyabwo” – abazwa n’uruhande rw’ubushinjacyaha n’ubwunganizi.
Itsinda ry’abashinjacyaha ryari rikurikiye mu buryo bw’amashusho riri i Arusha muri Tanzania, mu gihe ubwunganizi bwa Kabuga bwari mu rugereko rw’i La Haye mu Buholandi, rwasigaye ruca imanza zasizwe n’urwari urukiko mpuzamahanga mpanabyaha rw’Arusha rwari rwarashyiriweho u Rwanda.
Kabuga, wari ukurikiye iri bazwa ari kuri gereza y’urukiko, nta kanya yahawe ko kuvuga ku buhamya bw’iyi nzobere.
Iburanisha ryashyizwe mu muhezo nibura inshuro imwe, ubwo iyi nzobere yari itangiye kuvuga ku makuru y’umwihariko ajyanye n’ubuzima bwa Kabuga, arimo nko kuba arwaye diyabete yo mu bwoko bwa kabiri.
Profeseri Henry Kennedy, inzobere ku buzima bwo mu mutwe wo kuri Kaminuza ya Trinity College Dublin muri Ireland, uri muri batatu bakoze iyo raporo, yatangiye abazwa n’umushinjacyaha Rupert Elderkin.
Mbere yuko gutanga ibimenyetso by’ubushinjacyaha biba bihagaritswe – raporo y’inzobere yavuzweho mu rukiko ko irimo uko ubuzima bwa Kabuga bumeze “budatuma ashobora kwitabira urubanza rwe mu buryo bwa nyabwo”.
Icyo gihe, ibyavuzwe muri iyo raporo harimo ko “ubuzima bwo ku mubiri no mu mutwe” bwe “bwagabanutse” kandi ko afite ikibazo gikomeye cyo kwibagirwa (“clinical dementia”).
Umushinjacyaha Elderkin yabajije Profeseri Kennedy niba abona ko gukomeza urubanza byagira ingaruka kuri Kabuga, nuko asubiza asubiramo ibyo mu kiganiro bagiranye mu kumusuzuma, aho ngo yamubajije ati:
“Urashaka ko urubanza rukomeza?” Kabuga ngo arasubiza ati: “Oya, ndarwaye cyane. Sinakwifuza ko urubanza rwanjye rukomeza”.
Profeseri Kennedy yanabajijwe igihe we na bagenzi be bamaranye na Kabuga mu isuzumwa rye riheruka, avuga ko atacyanditse ariko ko bahereye mu gitondo bakageza mu gice cya nyuma ya saa sita.
Yanavuze ko Kabuga afite ikibazo cyo kugira urujijo no kudasobanukirwa aho aherereye, cyavuzwe mu rukiko nka “delirium”.
Umushinjacyaha Elderkin yabajije Profeseri Kennedy niba icyo kibazo umuntu ashobora kukigira icyarimwe no kwibagirwa cyane (dementia), asubiza “yego”.
Yanavuze ko ibyo bigabanya ubushobozi bwo mu bitekerezo, ko umuntu ashobora kumva igisobanura cy’amagambo ariko ntiyumve icyo ashatse kuvuga kindi (cyangwa “implication”).
Mu izina ry’itsinda ryunganira Kabuga, Maître Dov Jacobs niwe wabajije Profeseri Kennedy. Amubaza niba ubu yakwemeza ko Kabuga afite uburwayi bwo kwibagirwa cyane, asubiza ko ubu bishoboka kuvuga ko afite ubwo burwayi.
Yamubajije niba bishoboka ko umuntu yabyigira ko afite ubwo burwayi kandi akabikora mu gihe kirekire kandi ku bantu benshi.
Profeseri Kennedy amusubiza ko adasobanukiwe n’icyo yashatse kuvuga ku gihe kirekire, ariko ko bishoboka ko umuntu yabeshywa kandi ko ibyo abizi, ariko ko ubu ashingiye ku bimenyetso aho gushingira ku marangamutima, indwara yo kwibagirwa cyane ashobora kuvuga ko Kabuga ari yo arwaye.
Yanavuze ko ubwoko bwa “vascular dementia” Kabuga arwaye budashobora gukira.
Maître Jacobs yanabajije ku byo avuga ko ubushinjacyaha bwatanzeho igitekerezo, ko Kabuga yajya abazwa mu buryo butaziguye, hatabayeho undi muntu hagati. Profeseri Kennedy yasubije ko ibyo Kabuga yasubiza ubu “byakwizerwa gacyeya ugereranyije na mbere”.
Bonomy yavuze ko kuba Kabuga “adashobora kwitabira urubanza rwe mu buryo bwa nyabwo”, nkuko biri muri iyo raporo y’inzobere, ari urukiko rwo kubifataho icyemezo. Profeseri Kennedy yemeranyijwe nawe kuri iyo ngingo.
Maître Dov Jacobs yanamubajije niba byashoboka ko Kabuga yaburanishwa mu bundi buryo nk’ubwo mu nyandiko, amubaza ko uko ibyo byashoboka, mu gihe ibyo bisaba kubanza gusobanukirwa icyo ibimenyetso bishatse kuvuga kindi byaba birenze ubushobozi bwe.
Profeseri Kennedy yasubije ko icyo yavuga ari uko mu gihe cy’umwaka ushize ubushobozi bwa Kabuga “bwacitse intege cyane”, ariko ko umucamanza ari we wo gufata icyemezo ku cyakorwa kuri uru rubanza.
Umucamanza Bonomy yavuze ko iburanisha rikomeza ku munsi w’ejo ku wa gatanu, Profeseri Kennedy akomeza kubazwa n’ubwunganizi bwa Kabuga, no gusubiza ibindi bibazo by’inteko y’abacamanza.
