Umufasha wa Nyakigendera Rwigara Assinapol yongeye gutumizwaho bwa kabiri n’urwego rw’Igihugu rw’ubugenzacyaha RIB nabwo yanga kurwitaba nyuma yaho yari yahawe urupapuro rumuhamagaza bwambere akavuga ko atakwitaba ubugenzacyaha mu cyunamo.
Urupapuro rwambere rwahamamagazaga Adeline Rwigara rwagaragazaga ko agomba kwitaba ubugenzacyaha taliki ya 8 Mata 2021 yitwaje urwo rupapuro rumuhamagara n’indangamuntu ye. Nyuma yuko yanze kwitaba kuri iyo taliki ubugenzacyaha bwamwoherereje urundi rwandiko rumutegeka kongere kwitaba taliki ya 12 Mata 2021 ariko nabwo amakuru ava mu bugenzacyaha avuga ko atigeze ahakandagiza ikirenge.
Nyuma y’urupapuro rwambere rumuhamagaza hari amakuru yavuzwe ko usibye kuba uyu mugore yaranze kwitaba kuko hari mu cyunamo nkuko we yabyivugiye ariko ko n’umwunganira mu mategeko atari mu Rwanda bityo ko atakwitaba batari kumwe.
Ubusanzwe iyo umuntu atumijwe n’Urwego rw’Ubugenzacyaha, aba agomba kwitaba kuko ari itegeko.
Iyo atitabye ku nshuro ya mbere, arongera agatumizwa kugeza ku nshuro ya gatatu.
Amategeko avuga ko iyo atitabye kuri iyi nshuro ashobora kuzanwa ku gahato amaze kwerekwa urwandiko rumuzana ku gahato rushyirwaho umukono n’umushinjacyaha.
Biteganywa n’Itegeko No 027/2019 ryo ku wa 19/09/2019 ryerekeye imiburanishirize y’imanza z’inshinjabyaha.
Uburyo busanzwe bukoreshwa buteganya ko Urwego rw’ubugenzacyaha bugeza urwandiko ku mukuru w’umudugudu akajyana n’umukozi warwo mu rugo rw’uwatumijwe bakarumwihera.
Ibi bikorwa mu rwego rwo kwirinda ko urwandiko rwahabwa umuzamu, umukozi wo mu rugo cyangwa umwana bakaba baruta cyangwa rukangirika ntirugere kuwarugenewe.
