Igisirikare cya leta ya Congo cyafashije umutwe w’iterabwoba wa FDLR mu bitero biherutse guhanganisha inyeshyamba za M23 n’igisirikare cya leta ya Congo nk’uko raporo ya Human Rights watch yasohotse kuri uyu wa kabiri ibyemeza.
Uyu muryango mpuzamahanga uvuga ko igisirikare cya Congo mu ntambara iherutse kugihuza na M23 yishyize hamwe n’imitwe itandukanye irimo na FDLR ngo iyifashe kurwanya M23.
Ibi bigaragara muri iyi raporo ni bimwe n’ibisanzwe bivugwa na leta y’u Rwanda ko igisirikare cya M23 gifasha umutwe w’iterabwoba wa FDLR.
Iyi raporo ikomeza ivuga ko abayobzi mu gisirikare cya Congo aribo batanze ubufasha ku mitwe y’inyeshyamba nyinshi irimo na FDLR ngo iyifashe kurwanya M23 mu mirwano yabaye hagati y’’ukwezi kwa Gicurasi (5) na Kanama (8) uyu mwaka.
Muri iyi raporo batangamo urugero rw’amasanduku menshi y’amasasu yavuye mu ngabo za Congo ahabwa inyeshyamba za FDLR zari muri pariki y’igihugu ya Virunga.
Umushakashatsi wa Human Rights Watch muri Congo, Thomas Fessy avuga ko : Igisirikare cya Congo cyongeye gukorana n’inyeshyamba ibintu bituma giterwa icyizere kandi cyari gitangiye kwiyubaka mu buryo bwa Kinyamwuga.”
Thomas Fessy akomeza agira ati : “ Leta ya Congo igomba guhagarika gukorana n’inyeshyamba kuko bitesha agaciro igisirikare cyayo bigatuma kitanabazwa inshingano zacyo.”
Igisirikare cya Congo na Leta ntacyo biratangaza kuri iyi raporo yasohotse uyu munsi.
U Rwanda ruhora rusaba leta ya Congo kudakorana n’umutwe wa FDLR ifatwa nk’umutwe w’iterabwoba unagizwe na benshi mu bakekwaho uruhare muri Jneoside yakorewe abatutsi mu 1994.
