Kuri uyu wa gatatu abayobozi mu gihugu cya Norvege batangaje ko bafunze umuntu ukekwaho kugira uruhare muri Jenoside yakorewe Abatutsi uri mu kigero cy’imyaka 40 y’amavuko.
Thea Elise Kjæraas, umuvugizi w’ikigo cy’igihugu gishinzwe iperereza ku byaha muri Norvege yavuze ko bakoze iperereza ryinshi mbere yo guta uyu muntu muri yombi kuko hari impapuro z’u Rwanda zasabaga kumuta muri yombi akoherezwa mu Rwanda akaburanishwa cyangwa Norvege ikamuburanisha.
Uyu muyobozi ariko akomeza agira ati : “Iperereza riracyakomeje niyo mpamvu tutatangazaho byinshi.” Kjæraas yongeyeho ati: “Ntabwo rero dushobora kujya mu makuru arambuye.
Ntiharamenyekana igihe uyu munyarwanda yafatiwe ndetse n’umwirondoro we urimo amazina, icyo akora, igihe yagereye muri Norvege n’ibindi biracyagizwe ibanga.
Gusa biteganyijwe ko uyu munyarwnada ufunzwe azagezwa imbere y’ubutabera vuba akaburana ku ifungwa n’ifungurwa ry’agateganyo mbere y’uko atangira kubura ku iyoherezwa rye mu Rwanda akaba ariho aburanira cyangwa niba azaburanira muri Norvege.
