Nyuma y’amezi 8 u Rwanda rutangije gahunda yo gukingira Covid-19, ubu Abanyarwanda barenga miliyoni 2 baamze kubona inking ebyiri zigenwa kugirango umuntu abe yikingije iki cyorezo mu buryo bwuzuye.
Ikigo cy’Igihugu gishinzwe ubuzima, RBC, gitangaza buri musni abantu bakingiwe, abanduye iki cyorezo, abitabye Imana n’abasezerewe mu bitaro. Ku mugoroba wo kuri uyu wambere iki kigo cyagaragaje ko ubu abagera kuri 2.032.065 aribo bamaze kubona inking zombie ziteganywa n’ishmi ry’umuryango wabibumbye ryita ku buzima.
Iyi raporo igaragaza ko 2.032.065 bakingiwe nyuma y’uko ku wa 1 Ugushyingo 2021, abahawe dose ya kabiri y’urukingo rwa Covid-19 ari 41.960 mu gihe abafashe iya mbere ari 75.415 byatumye umubare wabo ugera kuri 3.884.463.
U Rwanda rukomeje gukingira umubare munini w’abaturage barwo ndetse rwatangiye gukora ubushakashatsi bushobora gusiga hatanzwe urukingo rwa gatatu rwa COVID-19 no gukingira abari munsi y’imyaka 18.
Urukingo rwagize akamaro mu kugabanya imfu n’indembe za Covid-19 kuko ubu ibitaro byinshi byakiraga indembe za Covid-19 bimaze gufungwa hakaba hasigaye ibitaro 1 gusa.
Abanyarwanda benshi bitabiriye ibikorwa byo gukingirwa mu kwirinda binatuma bakomorerwa ibikorwa byinshi birimo inama, ibitaramo, kwitabira imikino mu masitade n’ibindi.
N’ubwo hamaze gukingirwa abarenga miliyoni 2 z’abaturarwanda, ntibikuyeho ko ingamba zo kwirinda Covid-19 zirimo kwambara agapfukamunwa, gusiga intera hagati y’umuntu n’undi, gukaraba intoki kenshi no kwipimisha igihe biringombwa zikomeje gukurikizwa.
Minisante kandi yatangaje ko kuri uyu munsi, abantu 29 banduye COVID-19 mu bipimo 8.346 mu gihe nta winjijwe mu bitaro. Umurwayi umwe ni we urembye.
Igabanuka ry’abarwayi ba COVID-19 ni ryo ryatumye Ibitaro bya Nyarugenge byavurirwagamo abanduye iki cyorezo bifungwa, bikongera gutanga izindi serivisi z’ubuvuzi mu gihe Ibitaro bya Kanyinya ari byo bizajya bivurirwamo COVID-19 ku rwego rw’igihugu.
Mu masaha 24 ashize, umugabo umwe w’imyaka 73 wo mu Karere ka Gicumbi yahitanywe n’icyorezo cya COVID-19.
