Umukandida watsinze amatora Joe Biden yavuze ko abantu bashobora gupfa mu gihe ubutegetsi bwe bwiteguraga kujyaho bukomeje kubangamirwa na Donald Trump.
Uyu perezida watowe ibyo yabivugiye muri leta ya Delaware, aho yavuze ko hacyenewe guhuza ibikorwa mu rwego rwo guhangana n’iki cyorezo cya coronavirus.
Yagize ati” Nta gushyira mu gaciro na busa biri mu kuba Perezida Trump yaranze kwemera ko yatsinzwe amatora, nubwo ku mpande zombi z’abarepubulikani n’abademokarate harimo abamusabye kubikora.”
Michelle Obama, umugore wa Barack Obama wahoze ari Perezida w’Amerika, yanditse ku mbuga nkoranyambaga ati: “Ibi si umukino”.
Ibimaze kuva mu matora kugeza ubu
Joe Biden yabonye amajwi 306 y’intumwa zitora (electoral college) aribwo buryo Amerika itoramo perezida arenza ikigero cy’amajwi 270 ubundi aba acyenewe ngo umukandida atorerwe kuba perezida.
Nyamara ariko Bwana Trump, umurepubulikani, ku wa mbere mu gitondo yanditse kuri Twitter ati: “Natsinze Amatora!” nanone kandi itsinda ryari rishinzwe kwamamaza Trump ryatanze ibirego mu nkiko ryamagana uko amajwi yabazwe mu matora yo ku itariki ya 3 y’uku kwezi.
Ese hari abashyigikiye Trump?
Ikigo cya leta ‘General Services Administration’ (GSA) gishinzwe gutangiza ubutegetsi bwa perezida mushya, ntabwo kiremera intsinzi ya Bwana Biden na Kamala Harris watorewe kuba visi perezida.
Ibyo bituma hari amakuru y’ingenzi ya leta badahabwa ubusanzwe ahabwa abagize ubutegetsi bwitegura kujyaho. Abajyanama b’uyu perezida watowe bavuze ko kuba Trump yaranze guhererekanya ubutegetsi bivuze ko itsinda rya Biden ryahejwe mu bikorwa bijyanye no guteganya uko gahunda yo gutanga urukingo rwa Covid-19 izagenda.
Mu ijambo rye ejo ku wa mbere, Bwana Biden avuga ku kuba ihererekanya ry’ubutegetsi ryaradindiye, yagize ati: “Hari uwaba yiyumvisha ibi? Bijyanye no kurokora ubuzima bw’abantu, mu by’ukuri, ibi ntabwo ari ugukabya abantu benshi bashobora gupfa niba tudahuje ibikorwa”.
Biden yavuze ko gutanga urukingo ari igikorwa cy’ingenzi cyane, ko niba itsinda rye rigombye gutegereza kugeza ku itariki ya 20 y’ukwezi kwa mbere ubwo azaba arahizwa ngo ribone gutangira gahunda yo gutanga urukingo, rizaba ryacyerereweho igihe kirenga ukwezi, ukwezi n’igice.
Mporebuke Noel
