Ntamuhanga Cassien wari uzwi nk’umunyamakuru mu Rwanda agakatirwa gufungwa imyaka 25 mu mwaka w’i 2015 agatoroka gereza muri 2018, nyuma akongera kuregwa ibyaha byo kugambanira Igihugu akongera gukatirwa imyaka 25 adahari biravugwa ko yafatiwe muri Mozambique.
Amakuru acicikana ku mbuga nkoranyambaga ahanini akwirakwizwa n’abatavuga rumwe na leta y’u Rwanda niyo yemeza ifatwa rya Ntamuhanga Cassien kuko hari n’abamutabariza.
Benshi mu bari gukwirakwiza aya makuru nibo banabanje gutangazwa ifatwa rya Nsabimana Callixte Sankara mu myaka ishize bitinda kwemezwa ariko nyuma aza kwerekanwa nk’imfungwa.
Ntamuhanga Cassien ni umwe mu bashakishwa cyane n’ubutabera bw’u Rwanda nyuma yo gukatirwa imyaka 25 mu 2015 mu rubanza rwaregwagamo n’umuhanzi Kizito Mihigo rwo kugambanira Igihugu. nyuma y’imyaka 3 muri gereza ya Mpanga yahise atoroka atangira gushakishwa ariko ntiyafatwa.
Mu gihe Ntamuhanga yari agishakishwa yongeye kuvugwa mu rundi rubanza rwo gushaka guhungabanya umutekano w’Igihugu areganwa n’umunyamakuru Phocas Ndayizera nabwo akatirwa n’inkiko gufungwa imyaka 25 yiyongera kuri imwe yambere iba 50.
Usibye kuba anashakishwa nyuma yo gutoroka ubutabera no gukatirwa adahari, umunyamakuru Ntamuhanga Cassien asanzwe abarizwa mu itsinda ryitwa abaryankuna naryo rivuga ko rirwanya leta y’u Rwanda.
Amakuru avuga ko yafatiwe muri Mozambique nta muyobozi muri Leta haba i y’u Rwanda cyangwa iya Mozambique uragira icyo ayavugaho.
