Uwayoboye igihugu cy’Uburundi Pierre Buyoya u Burundi mu bihe bitandukanye yapfuye kuri uyu wa Gatanu afite imyaka 71.
Ijwi rya Amerika ryatangaje urupfu rwe bwa mbere, ryavuze ko hakekwa ko yaba yazize icyorezo cya Coronavirus, ariko icyamuhitanye ntikiramenyekana mu buryo busobanutse.
Ubwo Ikinyamakuru Iwacu cyegeraga umwe mu bo mu muryango wa Buyoya, yakibwiye ko yapfuye ubwo yari mu nzira ajyanywe kuvurirwa mu Bufaransa.
Perezida Major Pierre Buyoya yayoboye u Burundi inshuro ebyiri (1987-1993, 1996-2003). Uyu mugabo aza ku mwanya wa kabiri mu bakuru b’igihugu bayoboye u Burundi imyaka myinshi (13).
Yari aherutse kwegura ku mwanya w’Intumwa nkuru y’Umuryango wa Afurika Yunze Ubumwe (AU) mu bibazo bya Mali na Sahel, nyuma y’iminsi mike akatiwe gufungwa burundu.
Burundi, urukiko rwamukatiye igifungo cya burundu nyuma yo kumuhamya uruhare mu rupfu rwa Perezida Melchior Ndadaye wishwe mu 1993.
Amakuru avuga ko mu ijoro ryo ku wa 21 Ukwakira 1993 nibwo Umutwe w’Abasirikare b’u Burundi wafashe umukuru w’igihugu, Melchior Ndadaye, wa mbere wari ugiyeho biciye mu matora ya demokarasi, uramwica.
Iyicwa rya Melchior Ndadaye ryakurikiwe n’ubwicanyi bwo kwihorera hagati y’Abahutu n’Abatutsi, Abarundi benshi bagera mu bihumbi 300 barishwe, abandi barahunga. Buyoya aheruka kuvuga ko atemera ibihano yafatiwe kuko urubanza rwabaye ku nyungu za politiki kandi rukaba binyuranyije n’amategeko.
Buyoya yavuze ko urubanza rwatangiye rugamije kuyobya amahanga ku mvururu zakuruwe na manda ya gatatu ihabanye n’Itegeko Nshinga ya Perezida Pierre Nkurunziza hagamijwe ubukangurambaga bushingiye ku moko buganisha ku matora yabaye mu 2020.
Yanavuze ko kandi kuba rwarasomwe mu gihe hibukwa imyaka 27 Ndadaye yishwe, nabyo ari ibyo kwibazwaho kuko bigamije kunezeza imitima y’abantu gusa.
Pierre Buyoya yari aherutse kuvuga ko azajuririra igihano yahawe kugira ngo agaragaze uburyo ari umwere.
Mporebuke Noel
