Igihugu cya Africa y’Epfo nicyo cyabaye igihugu cya mbere muri Africa cyageze ku bantu barenga miliyoni imwe banduye icyorezo cya Covid-19.
Ni nyuma y’ako abategetsi baho bemeje ko hari ubwoko bushya, bwandura vuba cyane, bwa coronavirus bwahabonetse. Amakuru ava mu bitaro bimwe n’amavuriro avuga ko biri kwakira abarwayi benshi ubushobozi bwabyo bukaba buri hafi kurengerwa.
Biteganyijwe ko Perezida Cyril Ramaphosa aza gutangaza ingamba zikomeye kurushaho zo kwirinda ko iyi virus ikwiragira kurushaho.
Ejo hashize ku cyumweru minisitiri w’ubuzima nibwo yatangaje iyi ntera y’abanduye bageze kuri miliyoni imwe, abanduye bose hamwe ubu ni 1,004,413 naho abamaze kwicwa na Covid hano ni 26,735.
Ni mu gihe mu cyumweru gishize Africa y’Epfo yatangaje umuhigo w’abanduye bashya benshi ku munsi, abo ni 11,700 – yari inyongera ya 39% ugeraranyije no mu cyumweru gishize. Urebye kuva kuwa gatatu kugeza kuwa gatanu imibare y’abanduye yabonekaga buri munsi yari hejuru ya 14,000.
Kugeza ubu ubwoko bushya bwa coronavirus bwabonetse – buzwi nka 051.V2 – bikekwa ko ari bwo buri kongera cyane iyi mibare. Bwabonywe n’abahanga mu ntara ya Eastern Cape buhita bukwira henshi mu gihugu.
Ibihugu bitandukanye ku isi byahagaritse ingendo z’indege zijya muri Africa y’Epfo kubera ubu bwoko bushya bw’iyi virus.
Nyuma ya Africa y’Epfo ikindi gihugu kibasiwe na Covid cyane muri Africa ni Maroc ifite abanduye 432,079 n’abantu 7,240 bapfuye. Hakurikiraho Misiri ifite abanduye 131,315 n’abapfuye 7,352 na Tunisia ifite abanduye 130,230 n’abapfuye 4,426.
Muri rusange muri Africa hamaze kuboneka abantu barengaho miliyoni 2.6 n’abamaze gupfa 62,000. Abo ni hafi 3% by’umubare w’abanduye iki cyorezo bose hamwe ku isi.
Ariko ubu bwoko bushya bwa coronavirus bwandura vuba cyane bwabonetse muri Africa y’Epfo buteye impungenge ko bushobora gutuma iki cyorezo cyiyongera kuri uyu mugabane.
Integonziza@gmail.com
