Nyuma y’iminsi mike ahawe imbabazi na Perezida Kagame, Paul Rusesabagina yakiriwe n’abo mu muryango we ku nshuro yambere basangira ifunguro nk’uko bitangazwa n’umukobwa we Carine Kanimba.
Kanimba avuga ko umuryango we wishimiye kongera guhura na Rusesabagina wari ufungiwe mu Rwanda nyuma yo guhamwa ibyaha by’iterabwoba. Kanimba Yasangije abamukurikira ku mbugankoranyambaga amafoto ari kumwe n’umubyeyi we.
Mbere y’uko Kanimba atangaza amafoto ya Rusesabagina, umwunganizi we mu mategeko Rayan Fayhee, niwe wabanje kugaragaza ifoto ye bari kumwe nawe avuga ko yishimiye ifungurwa rye.
Rusesabagina yarekuwe nyuma y’ibiganiro hagati ya leta y’u Rwanda na Amerika byahujwe na Qatar, nyuma yo gufatwa mu 2020 agakatirwa gufungwa imyaka 25 ahamijwe ibyaha by’iterabwoba.
Rusesabagina yarekuwe nyuma yo gusaba imbabazi avuga ko yicuza ibyakozwe n’umutwe wa FLN yari abereye umuyobozi. Usibye we n’abamwunganira mu mategeko nabo bandikiye Perezida Kagame bamusaba imbabazi. Kuva yafungurwa yahise ajya muri Qatar aho yavuye yerekeza muri Leta zunze ubumwe za Amerika. Rusesabagina we ntacyo aratangaza kuva afunguwe taliki ya 24 Werurwe.
