Ishami ry’umuryango w’abibumbye ryita ku iterambere PNUD, ritangaza ko umubare w’abinjira mu mitwe y’iterabwoba wiyongera buri mwaka bitewe n’ubukene. Ibi bigaragara cyane mu karere ka Afurika yo munsi y’ubutayu bwa Sahara.
Raporo y’uyu muryango ivuga ko akarere ka Afurika yo munsi y’ubutayu bwa Sahara ubu gafatwa nk’indiri y’imitwe y’iterabwoba cyane iyiyitirira idini ya Isilamu.
PNUD, muri icyo cyegeranyo isobanura ko abantu benshi bari kwinjira mu mitwe y’iterabwoba yiyitirira idini ya Isilamu muri iki gihe babiterwa n’ubukene kuruta uko baba babiterwa n’imyemerere yabo yo mu idini ya Isilamu.
92% by’abantu bashya binjira muri iyo mitwe bemereye PNUD, ko bayinjiyemo bagiye gushaka ubuzima bwiza. PNUD yemeza ko kuva mu 2017, imibare y’abinjira muri iyo mitwe kubera imyemerere yabo bagabanutse kukigero cya 57%.
Ku rundi ruhande, PNUD, ivuga ko hari n’abinjiye muri iyo mitwe kubera guhunga cyangwa kutishimira ihonyorwa ry’uburenganzira bwa muntu, n’ibindi bibi bikorwa n’inzego z’umutekano z’ibihugu byabo birimo ubwicanyi, gushimutwa, n’ubutabera butigenga.
Raporo ya PNUD yakorewe mu bihugu umunani (8) by’ Afurika yo munsi y’ubutayu bwa Sahara birimo; Burkina Faso, Kameruni, Cadi, Mali, Nigeri, Nijeriya, Somaliya, na Sudani. Ku bantu 2200 PNUD yasabye amakuru, abarenga 1000 bahoze mu mitwe y’iterabwoba yiyitirira idini ya Isilamu irimo: Boko Haram, Al-Shabab, Africa Jama’at Nusrat al-Islam wal Muslimeen na JNIM.
Uruhande rumwe rw’abatanze amakuru rwemeje ko bagiye muri iyo mitwe ku bushake bwabo, abandi bavuga ko bayigiyemo ku gahato. Mu bayivuyemo bayigiyemo ku bushake bwabo, hari abasobanuye ko bayivuyemo kubera amafaranga bemerewe ntibayahabwe hakiyongeraho n’abayobozi b’iyi mitwe bayiyoborana igitugu.
Ishami rya ONU rishinzwe iterambere, PNUD, rivuga ko kuva mu 2017, imitwe y’iterabwoba yiyitirira idini ya Isilamu imaze kugaba ibitero 4155 mu karere ka Afurika yo munsi y’ubutayu bwa Sahara.
