Muri Leta zunze ubumwe z’Amerika, Perezida Joe Biden, n’uwo yasimbuye Donald Trump, ku wa kabiri nijoro bujuje umubare w’intumwa zo kubimika nk’abakandida b’amashyaka yabo mu matora y’umukuru w’igihugu yo mu kwa 11 gutaha.
Amatora y’amajonjora imbere mu mashyaka y’Abademokarate n’Abarepubulikani, yantangiye mu kwezi kwa kabiri, aracyakomeza kugera mu kwa gatandatu gutaha.
Ariko kandida Biden wo mu Bademokarate na Trump wo mu Barepubulikani bakuyemo abandi bose, basigaye mu matora bonyine gusa.
Bombi batsinze amajonjora yo mw’ijoro ryo ku wa kabiri, yabaye muri leta za Hawayi, ikirwa kiri mu nyanja ya Pasifika, Georgia na Mississippi, zose uko ari eshatu mu majyepfo y’igihugu, na Washington iri mu burengerazuba bwa Leta zunze ubumwe z’Amerika. Byatumye Biden arenza umubare w’intumwa 1,968 yari akeneye, na Trump arenza 1,215 ba ngombwa.
Amajonjora narangira, amashyaka yombi azakoranya intumwa mu nama kaminuza, bita “Convention” mu Cyongereza, zizimika ku mugaragaro abakandida bombi.
Abarepubulikani bazakoresha iyabo kuva kuri 15 kugera kuri 18 y’ukwa karindwi mu mujyi wa Milwaukee muri leta ya Wisconsin. Iy’Abademokarate izaba kuva kuri 19 kugera kuri 22 mu kwa munani mu mujyi wa Chicago muri leta ya Illinois. Izi leta zombi ziri mu burengerazuba bwo hagati mu gihugu.
Hagati aho, Biden na Trump bazakomeza ibikorwa byabo byo kwiyamamaza. Bongeye guhatana mu matora nko mu 2020. Ni ubwa mbere mu myaka 70 abakandida babiri bahuriye mu matora y’umukuru w’igihugu inshuro ebyiri zikurikiranyije.
