Leta ya Addis Ababa n’abarwanyi ba TPLF bo muri Tigray bageze ku masezerano yo guhagarika imirwano mu ntambara imaze imyaka ibiri mu majyaruguru y’iki gihugu.
Nibwo bwa mbere impande zombi ziri kurwana zicaranye mu biganiro byeruye, byaberaga i Pretoria muri Africa y’Epfo.
Gusa aya siyo masezerano ya mbere yo guhagarika imirwano – ayabanje bayarenzeho muri Kanama(8) hashize amezi bayumvikanyeho.
Olusegun Obasanjo wahoze ari perezida wa Nigeria wari ukuriye ibiganiro hagati y’impande zombi, niwe watangaje ko zageze ku kumvikana.
“Ethiopia ifite igisirikare kimwe”, ni bimwe mu biri mu itangazo rihuriweho.
TPLF yameye kimwe mu bintu bikomeye – gushyira intwaro hasi, no kwinjiza abarwanyi bayo mu ngabo za leta.
Minisitiri w’intebe Abiy Ahmed yavuze ko aya masezerano ari “ingenzi” kandi yiyemeza kuyashyira mu bikorwa.
Umuryango w’Ubumwe bwa Africa wise ibi “intangiriro”, nk’uko bivugwa n’ibiro ntaramakuru AFP.
Umuhango wo gutangaza ko uko kumvikana guhagarika imirwano wari urimo Ambassador Redwan Hussain nk’intumwa ya minisitiri w’intebe Abiy Ahmed hamwe na Ato Getachew Reda intumwa ya TPLF.
Intumwa za TPLF muri ibi biganiro zavuze ko zizeye ko impande zombi zizubahiriza aya masezerano, nk’uko ibiro ntaramakuru Reuters bibivuga.
Mu byo bumvikanye harimo kwemera ko inkunga yo gufasha igera ku baturage no kurengera abasivile, nk’uko ishami rya BBC rya Amharic ribivuga.
Ishami rya ONU rishinzwe ubuzima ku isi rivuga ko 90% by’abaturage ba Tigray bakeneye inkunga y’ibiribwa.
OMS/WHO ivuga kandi ko 1/3 cy’abana bo muri ako gace bafite imirire mibi ikabije.
