Televiziyo yo mu Gihugu cya Guinea yatangaje ko umuhungu w’umukuru w’Igihugu, Teodoro Nguema Obiang Nguema, afunzwe azira kugurisha indege y’Igihugu.
Iyi televiziyo ivuga ko Ruslan Obiang Nsue, umuhungu wa Perezida Teodoro Obiang Nguema Mbasogo, uri ku butegetsi kuva mu mwaka wi 1979, afunzwe kuva ku wambere w’iki cyumweru azira kugirisha indege y’Igihugu.
Inzego z’ubutabera muri iki Gihugu zatangiye gukora ipererza kuri uyu muhungu mu kwezi k’Ugushyingo umwaka ushize nyuma y’aho bamenye ko indege ATR 72-500 yaburiwe irengero.
Iyi ndege yaburiwe irengero nyuma yo koherezwa muri Espagne kugirango hakemurwe bimwe mu bibazo bya tekiniki yari ifite.
Amakuru avuga ko Obiang akekwaho kuyigurisha sosiyete ikora indege yitwa Binter Technic, ikorera i Las Palmas ku kirwa cya Grand Canary cyo muri Esipanye.
ATR 72-500 yakozwe mu mpera z’i 1980 n’uruganda rukora indege rwo mu Bubufaransa, Iyi ndege yagurishijwe ifite ubushobozi bwo gutwara abagenzi bagera kuri 74. Igiciro cy’iyi ndege ntikigeze gitangazwa.
Obiang wagurishije iyi ndege yahoze ari minisitiri wa siporo n’urubyiruko akaba yaranayoboye ikigo gishinzwe indege mu Gihugu, ubu yari umuyobozi w’ikigo cyita ku bibuga by’indege, Ceiba Aeropuertos.
Murumuna we wo kwa nyina wabo, akaba ari na Visi perezida w’Igihugu, Teodoro Nguema Obiang Mangue, yemeye ko mukuru we ariwe wagurishije iyi ndege y’Igihugu.
Abinyijije ku rubuga rwe rwa Twitter yavuze ko ari nawe wategetse ko afungwa
Teodoro Nguema Obiang Mangue ati: “Ruslan Obiang yemeye ko ari we wagurishije indege ya ATR.”
“Ntabwo ngiye kuyoborwa n’amarangamutima arimo isano y’umuryango cyangwa itonesha, niyo mpamvu nategetse ko ahita atabwa muri yombi kandi agashyikirizwa ubutabera.”
Umubyeyi w’uyu wagurishije indege, Perezida Teodoro Obiang Nguema Mbasogo, niwe mukuru w’igihugu umaze igihe kinini ku butegetsi kurusha abandi ku Isi ukuyemo abami.
Yafashe ubutegetsi muri Kanama 1979, ahiritse nyirarume, Francisco Macias Nguema ku butegetsi.
Perezida Obiang, avugwaho kutorohera abamurwanya kandi akaba ari umuhanga mu kuburizamo imigambi y’abashaka kumuhirika ku butegetsi.
Igihugu ayoboye gikungahaye k’umutungo kamere wa Peteroli n’ubwo abanyagihugu bakennye.
Banki y’Isi itangaza ko ubutunzi bw’iki Gihugu buri mu maboko y’abantu bake kuko abantu bane kuri batunu batuye iki gihugu ni ukuvuga abarenga miliyoni 1,4 bari mu bukene bukabije.
Usibye kuba iki gihugu gikennye n’ubwo gifite peteroli nyinshi kinagaragara mu Bihugu byamunzwe na ruswa kuko kiri ku mwanya wi 172 ku bihugu 180 biri ku rutonde rukorwa n’umuryango mpuzamahanga urwanya ruswa n’akarenga mu kurwanya ruswa.
Kuva mu kwezi k’ukuboza umwaka ushize abaturage benshi barakariye ubutegetsi nyuma yo kumenya ko iyi ndege yagurishijwe amafaranga akajya mu mifuka ya bamwe.
Abaturage bavuga ko kuva kera Perezida Obiang, yateguraga uyu muhungu we wagurishije iyi ndege nk’umusimbura we.
Mu mpera z’umwaka ushize ibihugu birimo Amerika, Ubwongereza n’Ubufaransa byafatiriye imitungo ya mukru w’uyu muhungu yari muri ibi bihugu ndetse Ubufaransa bwo bumukatira igifungo cy’imayaka 3 isubitse n’ihazabu ya miliyoni 30 z’amayero kuko nta bisobanuro by’aho yakuye iyi mitungo afite.
Muri Gashyantare umwaka ushize nibwo Perezida Teodoro Obiang Nguema Mbasogo, yiyamamarije kuyobora iki gihugu ku nshuro ya gatandatu (6) atsinda ku majwi 94,9%.
