Itsinda ry’abaganga bo muri Uganda ryateje impagarara mu mpera z’icyumweru gishize nyuma yo gupfukama imbere ya Perezida Yoweri Museveni bakamutakambira bamusaba kongera kwiyamamariza umwanya w’umukuru w’Igihugu ku nshuro ya karindwi.
Perezida Museveni w’imyaka 78 y’amavuko, wasabwe n’abaganga bamupfukamiye kongera kuyobora Uganda afatwa nk’umwe mu bakuru b’Igihugu bamaze igihe ku buetegtsi kuko aburiho kuva mu 1986. Amatora rusange ataha ateganijwe mu 2026.
Abaganga bahagarariye ishyirahamwe ry’abaganga bo muri Uganda (UMA) bari bitabiriye inama nyunguranabitekerezo yo gukunda igihugu mu murwa mukuru, Kampala. Muri iki gikorwa bari bayobowe n’umuyobozi w’iri shyirahamwe mu gikorwa cyo gutakambira perezida Museveni bamupfukamiye bamusaba kongera kwiyamamariza umwanya w’umukuru w’Iihugu nk’uko amahsuho atandukanye bigaragaza.
Urubuga rwa Nile Post ruvuga ko mu ijambo rye, umuyobozi wa UMA, Dr Samuel Odongo Oledo, yashimye perezida Museveni ku kuba yarahinduye gahunda y’ubuzima bw’igihugu ndetse akanazamura imibereho y’abo mu nzego z’ubuzima.
Televiziyo ya NTV yo ivuga ko umuyobozi w’abaganga muri Uganda yakomeje asaba Perezida Museveni kongera kwiyamamaza mu 2026 nk’umukandida ku mwanya wa perezida.
Ibi byo gupfukamira Perezida Museveni no kumutakambira byateje impaka ku mbuga nkoranyambaga, benshi bashinja iryo tsinda kuba ryarataye umurungo ugenga umwuga wabo bakinjira muri politiki.
Ariko kuri tweet, ishyirahamwe ry’abaganga muri Uganda, UMA, ryitandukanije n’iki gikorwa cyo gupfukamira Perezida Museveni bamusaba kongera kwiyamamaza,riavuga ko “ridahagarariye imikorere y’ishyirahamwe”.
Itangazo ryabo ryagiraga riti: “Ishyirahamwe ry’abaganga ba Uganda ryagiye rifatanya na perezida binyuze mu buryo busanzwe, bw’umwuga harimo no kumushimira binyuze mu bihembo byacu ngarukamwaka.”
