Amakuru ava mu igororero (icyahoze ari agereza) ya Nyanza izwi cyane nka Mpanga avuga ko umugabo wari umaze imyaka irindwi (7) ahafungiwe yatorotse iri gororero kuri uyu wambere.
Ntawukiryayo Jean Damascene wari uri kurangiriza igihano cye cyo gufungwa burundu mu igororero rya Nyanza (gereza ya Mpanga) niwe watorotse. Uyu yari yarakatiwe iki gifungo nyuma yo guhamwa n’icyaha cy’ubwicanyi mu mwaka w’i 2015
Umwirondoro we umaze gutangazwa ugaragaza ko avuka mu Karere ka Gisagara akavuka ku witwa Mbonyumwami na Mukamusoni. Ntawukuriryayo atorotse igororero afite imyaka 30 y’amavuko kuko yavutse mu mwaka wi 1993. ntihatangajwe uburyo yakoresheje atoroka.
Pelly Gakwaya, umuvugizi w’urwego rushinzwe amagororero mu Gihugu, yemeye ko uyu muntu wari ufunzwe yatorotse kuri uyu wambere ariko ko bitari bisanzwe
Gakwaya ati: ” Biracyari mu iperereza ari no gushakishwa twizeyeko azafatwa.”
Gakwaya akomeza avuga ko gutoroka igororero mu Rwanda bitari biherutse kandi ko nta gikuba cyacitse.
Amategeko ateganya ko utorotse igororero (gereza) agafatwa ajyanwa mu rukiko akaburana icyo cyaha cyamuhama kikiyongera ku bindi yari afungiwe mbere.
