Perezida wa Gineya-Bissau avuga ko uwateguye umugambi wo kumuhirika ku butegetsi mu cyumweru gishize yamaze igihe muri gereza zo muri Amerika azira gucuruza ibiyobyabwenge. Perezida ntiyavuze izina ry’uwari ushatse kumuhirika ku butegetsi akoresheje igisirikare n’ubwo yatangaje ko amuzi.
Perezida Umaro Sissoko Embaló yavuze ko uwahoze ari umuyobozi w’ingabo zirwanira mu mazi na babiri mu bamufasha bagize uruhare mu mugambi wo kumwica, minisitiri w’intebe n’abandi bayobozi bakuru mu gihugu.
Yavuze ko yabonye babiri mu bagabo ku ngoro ya perezida mu gihe cyo gushaka guhirika ubutegetsi.
Bwana Embaló yari ayoboye inama y’abaminisitiri ubwo abantu bitwaje intwaro barasaga ku nzu yaberagamo iyo nama.
Abantu 11 barapfuye, abenshi muri bo bakaba bari mu nzego z’umutekano.
