Ku wa kabiri w’iki cyumweru, perezida wa Repubulika ya Centrafrique , Faustin Archange Touadéra, yirukanye umucamanza mukuru w’iki gihugu, iki gikorwa abatavuga rumwe n’ubutegetsi bavuga ko bagifashe nko “gutesha agaciro itegeko nshinga” agamije kwiyongerera igihe ku butegetsi.
Touadera yasohoye iteka rya perezida, ryirukana Daniele Darlan ,umucamanza mukuru mu rukiko rushinzwe kurinda itegeko nshinga risomwa kuri televiziyo na radiyo by’igihugu.
Perezida Touadera yirukana uyu mucamanza yavuze ko yashingiye ku mabwiriza yemejwe mu 2017 yerekeye itorwa n’ishyirwaho ry’abacamanza mu nkiko, anavuga ko Darlan ubu agomba “gukumirwa burundu” ku mirimo ye. iki cyemezo cyanamwirukanye muri kaminuza yari asanzwe yigishamo ibijyanye n’amategeko i Bangui.
Ihuriro ry’amashyaka atavuga rumwe n’ubutegetsi n’imiryango itari iya leta, Umuryango uharanira Repubulika no kurengera Itegeko Nshinga (BRDC), ushinja Touadera kwica itegeko nshinga.
BRDC yagize ati: “Kurenga ku mategeko n’itegeko nshinga rivuga ko abacamanza bo mu rukiko Rushinzwe Kurinda Iremezo ry’Itegeko Nshinga badashobora kuvanwa ku mirimo yabo.”
Darlan yabaye ihwa rimaze igihe kinini kuruhande rwa Touadera kandi yakunze kwibasirwa cyangwa akangishwa n’abantu ku mbuga nkoranyambaga no mu myigaragambyo yakorwaga n’abashyigikiye ubutegetsi bwa Perezida Touadera.
Ku ya 23 Nzeri, urukiko rwari ruyobowe na Darlan rwanze icyemezo cya perezida gishyiraho komite ishinzwe kuvugurura itegeko nshinga – iki kikaba cyarateye ubwoba Touadera washakaga guhindura itegeko nshinga ngo yiyamamarize manda ya gatatu yo kuyobora iki gihugu kandi bitemewe n’itegeko nshinga ririho ubu.
Darlan yabwiye itangazamakuru ko ntacyo yatangaza kuri iki cyemezo kugeza igihe abamushyigikiye batanze ikirego mu nkiko basaba ko agarurwa mu kazi bazaba bamaze gusomerwa umwanzuro.
Central Africa ni kimwe mu bihugu bikennye cyane ku isi kikaba kinugarijwe n’ibibazo by’umutekano kuva cyabona ubwigenge mu mwaka wi 1960.
Perezda Touadera yatorewe kuyobora iki gihugu muri manda yambere mu mwaka wi 2016 nyuma atorerwa manda ya kabiri mu 2020, n’ubwo aya matora hari abayanenze.
U Rwanda ni kimwe mu nshuti z’iki gihugu kikaba kinafiteyo abasirikare mu butumwa bw’amahoro n’abandi boherejwe n’u Rwanda batari mubutumwa bw’amahoro bagiye gufasha ingabo z’iki gihugu kurwanya imitwe yitwaje intwaro.
