Inzego z’umutekano muri Repubulika ya Demokarasi ya Congo zifunze umunya Kenya ukekwaho kuba umurwanyi mu mutwe w’iterabwoba wa ADF, akaba anakekwaho kuba ari mu bateye igisasu mu rusengero kigahitana abarenga 10 kikanakomeretsa benshi mu burasirazuba bwa Congo kuri iki cyumweru.
Inzego z’umutekano muri Congo ntizatangaje umwirondoro w’uyu munya Kenya n’ubwo zemera ko zimufunze. Ishami rishinzwe krwanya iterabwoba muri Kenya zo zivuga ko ufungiwe muri Congo ari Abdirizak Muktar Garad, w’imyaka 29 wakuriye mu majyaruguru ya Kenya ahitwa Wajir .
Igisasu cyaturikiye mu rusengero kuri iki cyumweru ahitwa Kasindi cyahitanye abantu icumi (10) gikomeretsa n’abandi 39 nk’uko bitangaza n’igisirikare cya Congo FARDC.
Anthony Mualushayi, umuvugizi w’ingabo za Congo mu gace kabereyemo iki gikorwa cy’iterabwoba avuga ko umunyakenya wafashwe yari afite aho ahuriye n’imigambi yo guturitsa iki gisasu.
Nta mutwe w‘iterabwoba urigamba iki gitero ariko leta ya Congo biciye mu gisirikare cyayo FARDC yahise ivuga ko iki gitero cyakozwe n’umutwe w’iterabwoba ukomoka muri Uganda wa ADF (Allied Democratic Forces ).
N’ubwo ADF bizwi ko ari iy’Abanya Uganda akaba ari nabo benshi bayigize sibwo bwambere umunya Kenya afatiwe muri Congo akekwaho kuba umurwanyi w’uyu mutwe kuko muri Mutarama umwaka ushize, Salim Rashid Mohamed uzwi cyane nka Chotara, nawe yatawe muri yombi nyuma y’igihe ahigwa ashinjwa gushakira uyu mutwe abarwanyi mu bihugu bigize umuryango wa Afurika y’Uburasirazuba.
Icyo gihe leta ya Congo yatangaje Salim Rashid Mohamed yinjiye muri Congo anyuze muri Uganda avuye muri Kenya.
