Urukiko Rwisumbuye rwa Nyarugenge rwasubitse iburanisha ku rubanza ruregwamo uwahoze ari Umunyamabanga Mukuru w’Ishyirahamwe ry’Umukino wo Gusiganwa ku Magare (FERWACY), Munyankindi Benoît, ukurikiranyweho icyaha cyo gufata icyemezo gishingiye ku itonesha, ubucuti, urwango, ikimenyane cyangwa icyenewabo no guhimba, guhindura inyandiko cyangwa gukora inyandika mpimbano.
Urukiko rw’Ibanze rwa Kicukiro rwari rwategetse ko akurikiranwa afunzwe ku wa 12 Nzeri 2023 kubera hari impamvu zikomeye zituma akekwaho ibyaha akurikiranyweho, icyemezo uregwa yahise ajuririra.
Urukiko Rwisumbuye rwa Nyarugenge rwagombaga kuburanisha urubanza mu bujurire ku ifungwa n’ifungurwa ry’agateganyo kuri uyu wa Mbere, tariki ya 9 Ukwakira 2023, ariko Munyankindi Benoît yagaragaje ko adafite umwunganira mu mategeko bityo ko ataburana atunganiwe asaba ko urubanza rwasubikwa.
Urukiko rwategetse ko urubanza rusubikwa rukazasubukurwa ku wa 23 Ukwakira 2023.
Ibyaha akurikiranyweho bifitanye isano no kuba yarasabiye umugore we Visa yo kujya muri Ecosse, akamushyira kuri lisiti y’abagomba guherekeza Ikipe y’Igihugu yari igiye gusiganwa muri Shampiyona y’Isi kandi nta nshingano yari afite muri iyo delegasiyo.
Ubwo yagezwaga imbere y’Urukiko rw’Ibanze rwa Kicukiro, yahakanye ibyaha akurikiranyweho avuga ko umugore we yagiye mu irushanwa ahagarariye Ikipe ya Nyabihu [Cycling Team], asanzwe abarizwamo kandi ifite abakinnyi bari muri Shampiyona y’Isi yabereye i Glasgow muri Ecosse.
Yavuze ko yashakaga kureba urwego abakinnyi b’ikipe yari ahagarariye bariho no kurushaho kwiga ibyanozwa mu kwitegura Shampiyona y’Isi y’Amagare izabera mu Rwanda mu 2025.
Uwineza Providence usazwe ari Umunyamabanga Mukuru wa Nyabihu Cycling Team ngo yasabye Ishyirahamwe ry’Umukino wo gusiganwa ku Magare uburenganzira guherekeza Ikipe y’Igihugu arabyemererwa abona gushyirwa kuri lisiti nka ’Accompanying Sport Delegation’ bivuze ko yari umuherekeza atari agiye mu kazi.
Icyaha Munyankindi akurikiranyweho gihanwa n’itegeko ryo kurwanya ruswa, uwo gihamye ashobora gufungwa imyaka itanu ariko itarenze irindwi n’ihazabu ya miliyoni 1 Frw ariko zitarenze miliyoni 2 Frw.
Ku wa 9 Nzeri 2023 ni bwo Inteko Rusange Idasanzwe ya FERWACY yatereye icyizere Munyankindi, imweguza ku mwanya w’Umunyamabanga Mukuru ndetse biteganyijwe ko azasimbuzwa mbere ya tariki ya 21 Ukwakira 2023.
