Abantu 24 bagizwe n’abagabo, abagore n’urubyiruko, bafunzwe kuva ku ya 23 Gashyantare, mu murwa mukuru wa politiki Gitega. Bakekwaho gushinga amashyirahamwe aharanira uburenganzira bw’abatinganyi.
Ikinyamakuru SOS Media, gitangazako aba bafatiwe mu nama yari yatumijwe n’umuryango witwa Muco, iyi nama yari yatewe inkunga n’umuryango w’abanyamerika utanga ubufasha USAID.
Amakuru agera kuri iki kinyamakuru avuga ko: “Abapolisi benshi n’inzego z’ubutasi, baherekejwe n’abayobozi batandukanye binjiye aho inama yaberaga bafata abari bayitabiriye.”
Abagize iryo tsinda bose bafatiwe aho, bajyanwa gufungirwa mu kigo cy’igihugu gishinzwe iperereza.
Abafunzwe bose uko ari 24 bakekwaho gushaka gutangiza amashyirahamwe y’abaryamana bahuje ibitsina (abatinganyi).
SOS Media ikomeza ivuga ko “Aho bafatiwe, inzego z’umutekano zahasanze udukingirizo, n’inyandiko-sitati ku burenganzira no kurengera abaryamana bahuje ibitsina”.
Perezida w’Uburundi Ndayishimie Évariste aherutse kuvuga ko abatinganyi b’Abarundi baba imbere mu gihugu n’ababa hanze yacyo bakwiye kwamaganwa.
Ati : “[…] Abarundi baryamana bahuje ibitsina bari mu Burundi, ndetse n’ababa hanze y’igihugu, aho bari hose, ndetse no muri Amerika, bagomba kwirukanwa, baravumwe”, yabivugiye mu mwiherero w’abagize inteko ishingamategeko.
Uburundi ni kimwe mu bihugu 68 ku Isi bihana icyaha cy’ubutinganyi kuko ugihamijwe n’inkiko ahanishwa igifungo kiri kuva ku myaka ibiri n’ihazabu.
