Amategeko yo kwirinda mu minsi mikuru y’impera z’umwaka yashyizweho hirya no hino kw’isi mu gihe ibihugu byinshi bihanganye n’ubwiyongere bw’abarwayi ba coronavirus.
Mu Rwanda buri ntara ndetse n’umugi wa Kigali byashyizeho ingamba zitandukanye zo kwirinda ikwirakwira rya Covid-19 mu gihe bizihiza iminsi mikuru. Ibyo bigenda bigaragazwa n’indangururamajwi zitanga ubutumwa bwo kudakora ibirori no gukomeza kubahiriza amabwiriza yo kwirinda Covid-19.
Kurasa ibintu biturika kandi byakaka mu kirere hamwe n’andi makoraniro ntibyakozwe mu bihugu bitandukanye kimwe no muri Leta Zunze Ubumwe za America.
Muri Australia barashe umwaka nkuko bisanzwe ariko nta bantu bemerewe guterana ngo bakurikirane icyo gikorwa mu migo yo muri icyo gihugu.
Mu bihugu byo ku mugabane w’Uburayi ho bakajije cyane ingamba kuburyo hari hateguwe abashinzwe umutekano benshi mu kurinda ko hari abarenga ku mabwiriza. Ni mu gihe kuri uyu mugabane hari ubwoba ko hari ubundi bwoko bwa coronavirus bwadutse.
Mu Bufaransa hari hateguwe abapolisi 1000.000 bo kugenzura iminsi mikuru y’umwaka mushya no kubahiriza amasaha ya Guma mu rugo.
Nkuko tubikesha BBC,Mu Buhinde, i Delhi no mu yindi migi myinshi hashyizweho umukwabu hamwe n’amabwiriza akaze abuza amakoraniro y’abantu benshi bizihiza umwaka mushya.
Abantu barenga miliyoni 1.8 bamaze gupfa bahitanywe na coronavirus hirya no hino kw’isi kuva icyo cyorezo kimenyekanye kuva mu mwaka wa 2019. Abantu barenga miliyoni 81 bamaze kwandura icyo cyorezo.
Mporebuke Noel
