Donald Trump yatangaje kumugaragaro ko aziyamamaza mu matora ya perezida ya 2024 mu ijambo ryibanze ku kunenga uko politiki n’ubukungu bya Amerika bihagaze ubu.
Ari mu rugo rwe rwa Mar-a-Lago muri leta ya Florida imbere y’abakunzi be bari bahakoraniye, Trump yasubiyemo intero ye yo kugira “Amerika nziza nanone”.
Mu ijambo ryamaze isaha irengaho, yatangiye agira ati: “Kugira ngo tugire Amerika nziza kandi ikomeye nanone, iri joro ntangaje ko nziyamamaza ku mwanya wa perezida wa Amerika.”
Trump, w’imyaka 76, yamaze imyaka ine ku butegetsi atsindwa na Joe Biden ubwo yashakaga manda ya kabiri, yakomeje gusubiramo, nta bimenyetso yerekana, ko yibwe amajwi.
Mu ijambo rye yagize ati: “Kuva ubu rero kugeza ku munsi w’amatora mu 2024…Nzarwana kurusha undi wese wigeze ubikora mbere. Tuzatsinda abahezanguni b’abademokrate barimo kugerageza gusenya igihugu cyacu bakirimo.”
Trump yavuze ko mu myaka ine ari ku butegetsi “abantu bose bari bameze neza. Buri muntu yariho abaho neza kurusha ikindi gihe cyose mbere”.
Yavuze ko ubukungu bwa Amerika bwariho buzahuka vuba ubwo yavaga ku butegetsi nyuma y’uko buzahajwe n’icyorezo cya Covid.
Ati: “Ubu turi igihugu kirimo guhirima”, akomoza ku izamuka rikomeye ry’ibiciro muri Amerika.
“Ntacyo ‘navuga’” – Biden
Abanyamakuru bagendanye na Perezida Joe Biden aho ari muri Indonesia bavuze ko abajijwe kugira icyo avuga ku ijambo rya Trump yavuze ko ntacyo.
Biden yari yicaranye mu nama na Perezida Emmanuel Macron i Bali mu gihe Trump yariho avuga ijambo muri Amerika, ahita asabwa n’abanyamakuru kugira icyo arivugaho.
Abanyamakuru bavuze ko yasubije ati: “Hoya, ntacyo mu by’ukuri.”
Gusa abagize itsinda rye kuri Twitter bahise bashyira kuri Twitter inkuru y’amashusho kuri Donald Trump iherekejwe n’ubutumwa buvuga ngo “Trump yananiwe Amerika”.
Ivanka ntazafasha se
Ivanka, umukobwa wa Donald Trump, yasohoye itangazo rivuga ko atazafasha se mu bikorwa byo kwiyamamaza ku matora ya 2024.
Yanditse ati: “Nkunda cyane data, [ariko] kuri iyi nshuro, nahisemo gushyira imbere abana banjye bato n’ubuzima bwite turimo kubaka nk’umuryango.”
“Simfite gahunda yo kujya muri politike. Mu gihe iteka ryose nzakunda kandi nkashyigikira data, ubu noneho nzabikora hanze y’urubuga rwa politike.”
Ku gihe cy’ubutegetsi bwa se, Ivanka n’umugabo we Jared Kushner bombi bari abajyanama ba Trump bakuru, kandi bari bafite ijambo rikomeye mu migambi y’ubutegetsi.
Ivanka ntabwo yari mu rugo kwa se muri Florida ubwo Trump yatangazaga ko aziyamamaza mu 2024.
‘Ibi sinabishakaga’
Trump mu ijambo rye yagiye ashimangira ko intego ye ari ukurokora Amerika ibihe bibi irimo kubera ubutegetsi bw’abademokarate.
Ati: “Ibi sinabishakaga, nari nifitiye ubuzima bwiza, bworoshye”.
Gusa ijambo rye rirerekana ibindi kuko biboneka ko adashobora kwihangana ngo abeho atari ku gasongero ka politiki ya Amerika.
Hashize igihe aca amarenga ko azongera akiyamamaza, kandi nyuma yo gutsindwa mu myaka ibiri ishize nabwo yaciye amarenga ko azagaruka.
Mu ijambo rye uyu munsi Trump yagize ati: “Uku ntabwo ari ukwiyamamaza gusa. Ni ugushaka kurokora igihugu.”
Hagati aho abamushyigikiye bohererejwe ubutumwa bwa email bubasaba gutanga inkunga yo gushyigikira ibikorwa bye byo kwiyamamaza.
Donald Trump afite akazi gakomeye ko kuzabanza gutsinda amatora yo guhagararira ishyaka ry’abarepubulikani.
