Sehene Ruvugiro
Mu cyumba cy’inama cya Hoteli INFINITY iri i Kabarore, mu karere ka Gatsibo, i Burasirazuba, ni saa tanu ku masaha y’abahinzi bo mu mirenge igize aka karere. Bahisemo ko, kuri uyu wa gatatu tariki ya 25 Gashyantare 2026, ibyakabaye ubudehe biba inama. Bahisemo ko, aho guhurira mu murima nk’uko bisanzwe, bahura bakajya inama yatuma umusaruro w’ibikorwa byabo wiyongera.
Ku bufatanye bw’Akarere ka Gatsibo n’umuryago utegamiye kuri Leta, ukorana n’abahinzi CCOAIB, bagiranye inama n’abafashamyumvire ku buhinzi, babagezaho ibibazo abahinzi bahura na byo, muri gahunda y’ibyanyabigega (FOBASI) igamije kongera umusaruro w’ubuhinzi. Birimo kutagira ubwanikiro n’ubuhunikiro bihagije, ikibazo cy’inyongeramusaruro, n’ibindi birimo ubukangurambaga budahagije ku mikoresheze y’inyongeramusaruro, binyuze muri gahunda ya Smart Nkunganire.
Bikora bite?
Hifashishijwe iyi gahunda, Leta yunganira umuhinzi ku mbuto zo guhinga no ku ifumbire yose azakoresha. Urugero ni nk’aho, ubu ku mbuto y’ibirayi, umuhinzi yishyura amafaranga 785 ku kilo, Leta ikamwishyurira 1800. Ni ukuvuga ko umuhinzi, utari muri iyi gahunda, we yakwishyura agera kuri 2585.
Kuba iyi mbuto yakorewe ubushakashatsi ihenze, kimwe n’ifumbire, bisaba ubwunganizi bwa Leta kugira ngo umuhinzi ashobore kubyigondera. Ni yo mpamvu kutiyandikisha muri Smart Nkunganire, cyangwa gutinda kubikora, bituma abahinzi barara ihinga, cyangwa se bakiyambaza abacuruzi b’inyongeramusaruro (agro-dealers), bakabagoboka mu nzira yenda gusa n’uburiganya.
Uwitwa Uwumukiza Dieudonné acuruza inyongeramusaruro mu mirenge ya Rwimbogo,Gitoki na Rugarama. Agira ati “Iyo ngize amahirwe, umuntu nk’uwo asanga hari umuhinzi wafashe ifumbire cyangwa imbuto biri munsi y’ibyo yasabye. Icyo gihe mbiha wa wundi ku giciro cy’imbuto cyangwa ifumbire byunganiwe”. Ngo atabigenje atyo, “hari benshi barara ihinga”, kubera kutaba muri iyo gahunda cyangwa gutinda gusaba ifumbire n’imbuto.
Hekenewe kongera ubukangurambaga
Ese ubundi bikora bite? Bisaba iki kugira ngo umuhinzi akorane na gahunda Smart Nkunganire? Ibisobanuro bya Bwana Uwumukiza birahura n’iby’abahinzi ubwabo.
Kujya muri Smart Nkunganire bisaba kuba ufite umurima uri mu Rwanda, kandi uwufitiye icyangombwa cy’ubutaka-UPI. Kuba ufite telephone yahujwe na nomero yawe y’irangamuntu, kandi ukaba ufite umubare w’ibanga wihariye. Ibi birahagije kugira ngo umuhinzi, we ubwe cyangwa abifashijwemo n’undi, yiyandikishe muri iyi gahunda. Yandika *774#, agakurikiza amabwiriza. Abahinzi badashoboye kubyikorera babifashwamo n’abajyanama b’ubuhinzi n’abacuruzi b’inyongeramusaruro.
Ubusabe bw’umuhinzi buba bugaragaramo aho ubutaka buherereye, ingano yabwo, n’iy’inyongeramusaruro zikenewe. Nyuma yo gusuzuma ubusabe bwose, ibisubizo binyuzwa ku bajyanama b’ubuhinzi.
Na Meya yigishe nkunganire!
Uwumukiza Dieudonné asanga“Gahunda ya Smart Nkunganire imeze nk’irimo nk’ubwiru, umwihariko wa bamwe. Nyamara ubuhinzi ni ryo pfundo ry’imibereho y’igihugu. Ikwiye gufatwa nka gahunda zindi za Leta. Twakabonye Meya w’Akarere n’abamwungirije, ba Gitifu ku mirenge n’utugari, ba Sedo, abashinzwe imibereho myiza n’iterambere ku nzego zitandukanye, basobanurira abaturage iyi gahunda. Nyamara abaturage benshi ntibabizi.”
Ngo hari n’igihe umuntu uri mu nzego z’ubuyobozi, na we ubwe, ashobora kuza kugura inyongeramusaruro kandi atanditse. “Ubwo se uzarenganya umuturage? Na bo bakagombye kumenya iyo smart nkunganire!”
Usanga ngo abacuruzi b’inyongeramusaruro[agro-dealers], nk’abantu bakorana buri munsi n’abaturage, ari bo bahura mbere n’ingaruka z’ubwo bumenyi bucye. Ngo nubwo nta bukangurambaga buri mu masezerano baba barasinye, “Biba ngombwa ko tugerageza gukora aho ubwo bukangurambaga butageze.”
Ibi ngo rimwe na rimwe bibashyira mu kaga, kubera ko abona
“imbaraga nyinshi zishyirwa mu kugenzura amanyanga akorwa mu kwegereza abagenerwabikorwa inyongeramusaruro, kurusha mu bukangurambaga.”
Inenge zikwiye gukosorwa!
Shyirakera Jack, umuhinzi wo mu murenge wa Ngarama, ngo yigeze guhura n’ikibazo gikunze kuba no kuri bagenzi be. “Njye nagize ikibazo cyo gusanga UPI yanjye hari undi muntu wayibarujeho. Nakoresheje indi nari mfite, ariko nyine nabonye ifumbire nkeya ku yo nari nkeneye. Akenshi ibyo bikorwa na ba agro-dealers baba bashaka kwicururiza.”
Ese kuba hari undi muhinzi wafatiye inyongeramusaruro ku cyangombwa cyawe, hari ingaruka ku kuba yagutwarira ubutaka? Ntibishoboka, gusa bituma udahabwa inyongeramusaruro!
Ku kibazo cyo guhitamo imbuto zihingwa mu byanyabigega (FOBASI), Bwana Shyirakera asanga “kuba abahinzi batagira uruhare mu guhitamo imbuto zigomba guhingwa, bituma bamwe batitabira cyane iyo gahunda yo kongera umusaruro binyuze mu byanyabigega”
Muri buri murenge, hari agronome umwe ugomba gukorana n’abahinzi b’umurenge wose. Hagati ye na bo hari umujyanama w’ubuhinzi ku mudugudu. Inama yasanze icyo cyuho kiri mu bidindiza iyamamazabuhinzi no gutuma FOBASI itagera ku nshingano.
Igenamigambi ry’ubuhinzi
Bwana Uwumukiza asanga gahunda ya Smart Nkunganire na yo igomba kugendana n’igenamigambi rikozwe neza. Koko rero ngo rikwiye kujyanishwa n’ibihe bibiri by’ubuhinzi u Rwanda rugenderaho, ari byo A na B. Season A itangira muri Nyakanga, mu gihe B itangira muri Mutarama.
Ngo iyo igenamigabi rikoze neza, abahinzi batangira kwiyandikisha nko hagati y’amatariki 10-15 Nyakanga. Ibi ngo bituma habaho igihe gihagije cyo gusuzuma ubusabe, guhusanya inyongeramusaruro, no kunoza gahunda muri rusange, binyuze kuri ba bakozi badahagije, ari bo abajyanama b’ubuhinzi ku mudugudu, n’agronome umwe ku murenge.
Ni yo mpamvu, yaba Shyirakera w’umuhinzi, yaba se Uwumukiza w’umucuruzi, bose bemeza ko “gukangurira abahinzi kwiyandikisha muri Smart Nkunganire ku gihe” ari ngombwa! gukora igenamigambi ry’ubuhinzi hakiri kare.
