Urukiko rw’ubujurire mu mujyi wa kigali rugiye gutangira kuburanisha urubanza mu bujurire rwa Idamange Iryamugwiza Yvonne, ku cyaha cyo gupfobya Jenoside yahamijwe n’urukiko rukuru urugereko rwa Nyanza.
Idamange wikuye mu rubanza yahamirijwemo ibyaha bitandukanye byitezwe ko azagaragara imbere y’urukiko rw’ubujurire taliki ya 8 Werurwe.
Mu iburanisha ryibanze Idamange yaburanishijwe adahari kuko yivanye mu rubanza, gusa ibyaha yahamijwe yari yarabihakanye mbere y’uko mu mizi urubanza rutangira.
Urubanza rwe rwaburanishijwe n’urugereko rw’urukiko rukuru ruburanisha ibyaha byambukiranya imipaka n’ibikorerwa ku ikoranabuhanga kuko yarezwe ko ibyaha yabikoze yifashishije ikoranabuhanga.
Hagati ya tariki 31 z’ukwa mbere na 15 z’ukwa kabiri 2021 Yvonne Idamange yashyize kuri YouTube channel ye video umunani zitandukanye, mbere yabwo ntabwo yari azwi na benshi.
Gusa nyuma gato yo gutangaza video yise ‘Ijwi ry’Impanda’ tariki 15 z’ukwa kabiri yahise afatwa arafungwa, iyo video ni nayo ishingiyeho byinshi mu byaha yahamijwe n’urukiko rukuru.
Ibyo byaha yahamijwe birimo; guteza imvururu muri rubanda, gupfobya jenoside, gutesha agaciro ahashyinguwe imibiri y’abazize jenoside, gutangaza amakuru y’ibihuha hakoreshejwe ikoranabunga, no gutanga sheki (cheque) itazigamiwe.
Nyuma yo guhamwa n’ibi byaha byose yahanishwa gufungwa imyaka 15 n’ihazabu ya miliyoni ebyiri (2) z’amafaranga y’u Rwanda.
