Kuri iki cyumweru tariki ya 7 Mata, ubwo Perezida Paul Kagame ari kumwe na Madame we Jeannette Kagame, n’abanyacyubahiro barimo ba Perezida n’Abakuru ba za Guverinoma muri Africa n’ahandi ku Isi, yatangije icyumweru cyo kwibuka ku nshuro ya 25 Jenoside yakorewe Abatutsi mu 1994.
Ibikorwa byabimburiwe no kunamira inzirakarengane zishwe muri Jenoside yakorewe Abatutsi zishyinguwe ku rwibutso rwa Gisozi mu mujyi wa Kigali, hazirikanwa n’abandi bose bishwe muri iyi Jenoside.
Perezida Paul Kagame na Mme Jeannette Kagame, n’Abakuru b’Ibihugu barimo uwa Tchad, Idriss Déby, uwa Niger Mahamadou Issoufou, uwa Congo Brazzaville, Denis Sassou Nguesso, uwa Djibouti, Ismaïl Omar Guelleh, Visi Perezida wa Nigeria, Yemi Osinbajo na Minisitiri w’Intebe wa Ethiopia, Dr Abiy Ahmed, na Minisitiri w’Intebe wa Tanzania, Kassim Majaliwa, na Guverineri Mukuru wa Canada, Julie Payette bashyize indabo ku mva enye zishyinguyemo abasaga ibihumbi 250 bishwe muri Jenoside yakorewe Abatutsi ndetse habaho gucana urumuri rw’ikizere ruzamara iminsi 100 rwaka.
Mu bandi bashyitsi bitabiriye imihango yo kwibuka ku nshuro ya 25, Jenoside yakorewe Abatutsi mu 1994 barimo, Perezida wa Komisiyo y’Umuryango wa Africa yunze Ubumwe, (AU), Dr Faki Mahamat, Perezida wa Komisiyo y’Ubumwe bw’Uburayi (EU), Jean-ClaudeJuncker, intumwa ya Perezida w’Ubufaransa, Emmanuel Macron, Depite Hervé Berville, hari n’abayoboye ibihugu barimo Olusegun Obasanjo wayoboye Nigeria, Thabo Mbeki wayoboye Africa y’Epfo, Uganda ihagarariwe na Minisitiri w’Ububanyi n’Amahanga, Sam Kutesa n’abandi.
Nyuma y’uwo muhango wabereye ku rwibutso rwa Jenoside rwa Gisozi, Perezida Paul Kagame n’abandi bashyitsi bagiye ku nyubako ya Kigali Convention Center ari naho havugiwe ijambo ritangiza icyumweru cyo kwibuka ku nshuro ya 25 Jenoside yakorewe Abatutsi n’iminsi 100 ibyo bikorwa bizamara.
Insanganyamatsiko yo kwibuka ku nshuro ya 25 Jenoside yakorewe Abatutsi, igira iti “Twibuke Twiyubaka”.
Aya makuru tuyakesha ikinyamakuru Umuseke.
