Abatalibani bayoboye igihugu cya Afghanistan basoheye itangazo ribuza abagore n’abakobwa kwiga amashuri makuru na kaminuza ari mu gihugu.
Ni itangazo ryasohowe na ministeri y’uburezi, minisitiri avuga ko bigomba guhita bishyirwa mu bikorwa iri tangazo rigisohoka. Iki cyemezo kije gikurikira ikindi abatalibani bafashe bakigera ku butegetsi cyo kwirukana abakobwa bose bari mu mashuri yisumbuye.
Abagore n’bakobwa bo muri Afghanistan bababajwe n’iki cyemezo bahita bigaba mu mihanda bajya kwigaragambya n’ubwo imyigaragambyo yabo yaburijwemo n’inzego z’umutekano.
Umuryango w’abibumbye kimwe n’ibindi bihugu byamaganye iki cyemezo bivuga ko Abatalibani bari mu nzira nk’iyo barimo ubwo bari ku butegsti mu myaka yi 2000 babuza abakobwa kugera ku burezi bwibanze.
Umwe mu bayobozi mu muryango w’abibumbye avuga ko ibi byakozwe na Afghanistan bibabaje kuko ari ukwima bamwe uburenganzira bwo kwiga kandi bwemerewe buri wese.
Leta zunze ubumwe za Amerika zateguje leta y’Abatalibani kwitegura ingaruka z’iki cyemezo bafashe.
” Abatalibani bagomba kumva ko badakwiye guhabwa icyubahiro mu miryango mpuzamahanga mu gihe batubahiriza uburenganzira bw’abayafghanistan bose.”
” Nta gihugu cyatera imbere mu gihe giheza igice kimwe cy’abaturage bacyo.”
Iki cyemezo gitangajwe hashize igihe gihwihwiswa mu gihugu ko abagore bagiye kwirukanwa muri kaminuza ziri mu Gihugu. Iki nicyo cyemezo cyanyuma ku bagore leta y’Abatalibani ifashe kuko muri Werurwe Abatalibani babujije abagore kujya gusura pariki, kujya kuri pisine( swimming pool) mu nzu zikorerwamo siporo (Gyms) n’ahandi hahurira abantu benshi.
Umuryango w’abibumbye uvuga ko Afghanistan ituwe na miliyoni hafi 40, abagabo nibo benshi kuko bangana na miliyoni 20.43 mu gihe abagore ari miliyoni 19.4 bangana na 48.7%.
