Perezida Evariste Ndayishimiye w’u Burundi yagize Nestor Ntahontuye Minisitiri w’Intebe, asimbura Lt Gen (Rtd) Gervais Ndirakobuca uherutse gutorerwa kuba Senateri.
Gervais Ndirakobuca, avuye kuri uyu mwanya hasigaye igihe gito ngo awumareho imyaka itatu, ni umwnaya yagiyeho asimbuye Gen Bunyoni Alain Guillaume ubu ufunzwe.
Ntahontuye yagizwe Minisitiri w’Intebe kuri uyu wa 5 Kanama 2025 nyuma y’amezi umunani agizwe Minisitiri w’Imari, Ingengo y’Imari ndetse n’Igenamigambi.
Inshingano nshya ya Ntahontuye yemejwe bidasubirwaho na Sena y’u Burundi kuri uyu wa 5 Kanama, nyuma yo gutora biro yayo iyobowe na Ndirakobuca.
Ntahontuye afite impamyabumenyi y’icyiciro cya gatatu mu bijyanye n’ibarurishamibare, yakuye muri Kaminuza y’u Burundi.
Yakoze imirimo y’igenamigambi ndetse n’ubushakashatsi mu miryango irimo Care International, Oxfam na Global Fund mu Burundi no ku rwego rw’akarere.
Ubwo yagirwaga Minisitiri w’Imari mu Ukuboza 2024, yari asanzwe ari Perezida wa Komite y’umutwe w’abadepite ishinzwe gukurikirana ikoreshwa ry’umutungo w’igihugu, imari, ibikorwa by’ubukungu n’igenamigambi.
