Raporo nshya ya Reporters Sans Frontières (RSF) ku bwisanzure bw’itangazamakuru ishyira u Rwanda ku mwanya w’i 156 iriukuruye ku 155 mu mwaka ushize, uyu mwanya niwo wanyuma mu bihugu u Rwanda rhana nabyo imbibi.
Iyi raporo irebe ibihugu 180 ivuga ko u Burundi bwazamutse imyanya 13 u Rwanda rugasubira inyuma umwanya umwe, byombi biracyari mu bihugu biniga ubwo bwisanzure.
Iyi raporo yitwa World Press Freedom Index ivuga ko “itangazamakuru, urukingo nyarwo rw’amakuru ayobya, rinizwe neza neza cyangwa rinizwe igice muri 73% y’ibihugu 180 bishyirwa ku rutonde” na RSF.
Impande z’u Burundi n’u Rwanda ntacyo ziravuga kuri iyi raporo nshya.
Ku rutonde rushya rw’uyu mwaka, iyi raporo ishyira u Burundi ku mwanya wa 146, kuri raporo ya 2020 rwari ku mwanya wa 160.
Reporters Without Borders ivuga ko ubutegetsi bwa perezida mushya mu Burundi “buha icyizere abanyamakuru nyuma yo kwibasirwa” kuva mu 2015 kuri ‘coup d’état’ yapfubye.
RSF ivuga ko gufungura abanyamakuru ba Iwacu mu kwa 12/2020 bari bamaze umwaka urenga bafunze, no kuba perezida yarasabye abashinzwe itangazamakuru “gukemura ibibazo” leta yagiranye n’ibinyamakuru byafunzwe “nabyo byabonywe nk’ikimenyetso cyiza”.
Gusa ivuga ko abategetsi mu Burundi bagifite ibyo gukemura kuko hakiri “ubwoba no kwibuza gukora inkuru zimwe na zimwe ku binyamakuru bigikorera mu Burundi… cyane ko n’ibura ry’umunyamakuru Jean Bigirimana w’ikinyamakuru Iwacu mu kwa 07/2016 ritigeze rikorwaho iperereza nyaryo”.
Finland imbere, Eritrea inyuma
Iyi raporo ya 2021 ishyira u Rwanda ku mwanya wa 156, mu 2020 rwari ku mwanya wa 155.
RSF ivuga ko mu myaka ya vuba yabonye igabanuka ry’umubare w’ibikorwa bihohotera ubwisanzure bw’itangazamakuru mu Rwanda, “ariko kubuzwa no kwibuza gukora inkuru zimwe na zimwe bigihari cyane mu kwirinda kugirana ibibazo n’ubutegetsi”.
Iyi raporo ivuga ku munyamakuru Dieudonné Niyonsenga uzwi nka Cyuma Hassan wa ‘chaîne’ yo kuri YouTube Ishema TV, “wafashwe agafungwa mu buryo budasobanutse mu 2020 aregwa kurenga ku mategeko ya ‘guma mu rugo'”. Hashize amezi 11, yabaye umwere ararekurwa.
Abashinzwe itangazamakuru mu Burundi cyangwa mu Rwanda ntacyo baratangaza kuri iyi raporo nshya ya Reporters Without Borders.
Gusa mu Rwanda, raporo ya 2018 y’ikigo gishinzwe imiyoborere yitwa ‘Rwanda media barometer’ ivuga ko igipimo kitwa “Ubwisanzure bw’itangazamakuru” kiri hejuru ku gipimo cya 77%.
Iyi raporo ya 2021 ivuga ko Norway (Norvège), Finland na Sweden – bikurikiranye gutyo, ari byo biza imbere y’ibindi 180 mu kubahiriza ubwisanzure bw’itangazamakuru, mu gihe Ubushinwa, Turkmenistan, Korea ya ruguru na Eritrea bikurikiranye gutyo ari ibya nyuma.
Ibindi bihugu byo mu karere n’aho bihagaze:
- Kenya – 102
- Tanzania – 124
- Uganda – 125
- DR Congo – 149
