Abategetsi bo mu rwego rw’ubuvuzi muri Uganda bemeje umuti wo mu byatsi wakorewe mu gihugu ngo ukoreshwe ku barwayi ba Covid-19 ndetse no ku bundi bwandu buterwa na za virusi.
Ikigo cya leta kigenzura ubuziranenge bw’imiti – kizwi nka National Drug Authority (NDA) – cyavuze ko uwo muti ukorwa mu byatsi bikoreshwa mu buvuzi gakondo hagabanywa (horoshywa) ibimenyetso by’indwara nyinshi.
Ariko uyu ntabwo ari umuti uvura Covid-19.
Ikigo NDA cyafashe icyo cyemezo hashize icyumweru kiburiye abaturage ngo birinde gukoresha uwo muti uzwi nka Covidex, kivuga ko utaremezwa.
Kaminuza y’ikoranabuhanga y’i Mbarara, ahigisha Profeseri Patrick Ogwang wakoze uyu muti, na yo yavuze ko uyu muti ari uwayo, ivuga ko wari wagejejwe ku isoko mbere yuko ubanza kunyura mu nzira yemewe.
Ikigo NDA kivuga ko kuwemeza kwashingiye ku igenzura ry’ibanze, ubushakashatsi bwawutangajweho, ndetse n’inyigo ku kureba niba nta kibazo uteje.
Kandi ngo uwahanze ako gashya na we yakuyeho ibivugwa bidafitiwe gihamya ko uvura ukanarinda Covid-19.
Hashize amezi menshi uyu muti ugeze ku isoko.
Abawucuruza bawugurishaga ku giciro kitageze ku idolari rimwe ry’Amerika.
Ariko nyuma yuko ubwandu bwa Covid-19 bwiyongereye mu gihugu mu nkubiri ya kabiri y’iki cyorezo, igiciro cyaratumbagiye kigera ku madolari 22 (agera ku 21,000 y’u Rwanda).
Mu ntangiriro y’uku kwezi kwa gatandatu, Uganda yashyizeho gahunda ya guma mu rugo kubera kwiyongera gukomeye kw’abarwayi ba Covid-19, kwatumye abajya mu bitaro barushaho kwiyongera ndetse n’abapfa na bo bakiyongera.
Muri Uganda abantu barenga 850,000 bamaze gukingirwa Covid-19, aho abibandwaho ari abakozi bo mu rwego rw’ubuvuzi, abarimu, abageze mu zabukuru, ndetse n’abasanzwe bafite ubundi burwayi.
