Umunyamabanga nshingwabikorwa w’umurenge wa Mukindo mu Karere ka Gisagara hamwe n’abandi bagabo 6 bafungiye muri kasho y’urwego rw’igihugu rw’ubugenzacyaha RIB mu murenge wa Ndora, bakurikiranyweho guhohotera Niyomuhoza Joselyne.
Amakuru dukesha Radio Salus aravuga ko abatawe muri yombi na RIB ari Rutaganda Jean Felix (Gitifu), umuhuzabikorwa wa Dasso Ntahompagaze Emmanuel, Habyarimana Alphonse(Dasso), Hategekimana Charles(Wahoze ayobora umudugudu wa Mukindo), Macumi Ildephonse alias Bagora(umugabo w’uwahohotewe ariwe Niyomuhoza Joselyne), Nsengiyumva Vincent(umuturage), Habonimana Jean Baptiste (umuturage).
Umuvugizi w’urwego rw’igihugu rw’ubugenzacyaha RIB Dr Thierry Murangira yabwiye Radio Salus ko aba bagabo uko ari barindwi batawe muri yombi tariki ya 25 Kanama 2020, aho bakurikiranyweho ibyaha byo Gufunga umuntu binyuranijwe n’amategeko(kihariwe na Gitifu), gukubita cyangwa gukomeretsa ku bushake, ubufatanyacyaha mu kwambutsa cyangwa kugerageza kwambutsa umuntu aca ahatemewe, gufata ikemezo kibuza iyubahirizwa ry’amategeko, ibyaha bakoreye Niyomuhoza Joselyne.
Uko ikibazo giteye
Niyomuhoza ni Umurundikazi wacururizaga mu Kirundo mu Burundi wakundanye n’umugabo w’Umunyarwanda wita Macumu Ildapfonse, babana badasezeranye imbere y’amategeko, bamaze kubyarana abana babiri, ngo uwo mugabo atangira kuvuga ko aba bana atabashaka ngo ni indahekana.
Ngo mu myaka itatu ishize umwana wa kabiri bari baherutse kubyara yapfuye urupfu rudasobanutse. Niyomuhoza avuga ko uyu mwana wishwe na Macumu. Mu rubanza uyu mugore yari yaratsindiye kujya ahabwa indezo na Macumi Ildephonse babyaranye.
Itegeko riteganya iki?
Gufunga binyuranyije n’amategeko bihanwa n’ingingo y’ 151 itegeko 68/2018/30/08/2018. Baramutse babihamijwe n’urukiko ahanishwa igifungo kitari munsi y’imyaka 5 kitarengeje imyaka 7, gukubita cyangwa gukomeretsa ku bushake bagihamijwe n’urukiko bazahanishwa igifungo kitari munsi y’imyaka 3kitarengeje imyaka 5 n’ihazabu y’amafaranga 500.000-1.000.000frw.
Naho icy’ubufatanyacyaha mu kwambutsa cyangwa kugerageza kwambutsa umuntu aca ahatemewe gihanwa n’ingingo y’ 40 y’itegeko 13/08/2018 ryerekeye abinjira n’abasohoka, igihano k’igifungo kitari munsi y’iminsi 30 ariko kitarengeje amezi 6 n’ihazabu y’amafaranga hagati y’ibihumbi 500.000 na 1.000.000frw.
Umuvugizi wa RIB ati “Abayobozi baragirwa inama yo kwtwararika ntibitwaze imyanya barimo ngo bahohotere abantu, bage bakorana ubunyamwuga.” Yanashimiye abaturage kuko batangiye amakuru ku gihe.
Mporebuke Noel
