AS Kigali isezereye KCCA muri CAF Confederation Cup

Gutsinda igitego cyo hanze cyafashije AS Kigali gusezerera KCCA FC yo muri Uganda mu ijonjora rya kabiri rya CAF Confederation Cup nubwo yatsinzwe 3-1 mu mukino wo kwishyura wabereye kuri Stade ya Saint Mary’s Kitende kuri uyu wa Gatatu.

Ikipe KCCA yafunguye amazamu ku isegonda rya 20 ku gitego cyatsinzwe na Brian Aheebwa mu gihe uyu rutahizamu uhagaze neza muri Uganda, yatsinze icya kabiri ku wa 37 ku mupira yaherejwe na Bright Anukani.

Hashize iminota itatu igice cya kabiri gitangiye, AS Kigali yabonye penaliti yatsinzwe na Hakizimana Muhadjiri nyuma y’ikosa Musa Ramathan yakoreye kuri Abubakar Lawal mu rubuga rw’amahina.

AS Kigali yongeye gukora impinduka ku munota wa 64, Hakizimana Muhadjiri wari ufite ikarita y’umuhondo, asimburwa na Rurangwa Mossi.

Mugihe habura iminota 15 ngo umukino urangire, Brian Aheebwa yatsinze igitego cya gatatu cya KCCA mu gihe yananiwe gutsinda icya kane ku buryo yabonye ku munota wa 88, umupira ufatwa na Bate Shamiru.

Ku munota wa mbere muri itatu y’inyongera yashyizweho n’abasifuzi b’Abanya-Kenya, KCCA yabonye uburyo bukomeye ku ishoti ryatewe na Aheebwa, Bate Shamiru ashyira umupira muri koruneri mu gihe umusifuzi wo ku ruhande yerekanye ko habayeho kurarira.

Umukino warangiye ari 3-1, AS Kigali ikomeza ku gitego yatsindiye hanze nyuma yo kunganya ibitego 3-3 mu mikino yombi.

Twabibutsaga ko umukino ubanza wagombaga kuba tariki ya 23 Ukuboza 2020 i Kigali, ariko AS Kigali ihabwa ibitego 2-0 bya mpaga kuko KCCA itari ifite umubare uhagije w’abakinnyi, aho bamwe barwaye COVID-19.

AS Kigali izahura n’imwe mu makipe asezererwa mu ijonjora rya kabiri rya CAF Champions League, mu cyiciro kibanziriza amatsinda ya CAF Confederation Cup.

 

Mporebuke Noel

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *