Kuri uyu wambere umuturage wo mu mujyi wa Kigali yashinje Polisi y’Igihugu gufata umuzunguzayi (umucuruzi wo mu muhanda) ikamwambura ubusa ku karunda ariko polisi irabihakana ivuga ko umugore ariwe wiyambuye ubusa.
Uwiyita Indigo kuri twitter niwe wavuze bwambere kuri iki kibazo ubwo yashyiragaho ubutumwa bw’umutangabuhamya n’ifoto wavugaga ko byabaye areba bikabera mu mujyi wa Kigali rwa gati hafi y’uruganda rwa Sulfo.
Polisi mu kumusubiza yemeye ko yafashe uwo mugore ariko ihakana ko atariyo yamwambuye ubusa ahubwo ko umugore yiyambuye ubusa mu rwego rwo gutera ubwoba abapolisi bari bamufashe. Gusa polisi ntiyasobanuye uko byagenze niba yarakomeje gukurikirana uwo mugore ku cyaha cy’ubucuruzi butemwe yari afatiwe cyangwa niba uko kwiyambura ubusa kwe kwaratumye arekurwa.
Iyi nkuru yakozwe ku nkunga y’umuryango IMS
