Dore urutonde rw’agateganyo rw’inkingo ibihugu byo mu karere bigiye guhabwa

Ishami ry’umuryango w’abibumbye ryita ku buzima ku isi (OMS/WHO) ryatangaje gahunda y’agateganyo y’uko ibihugu bizahabwa inkingo za Covid-19 muri uyu mwaka, aho mu karere k’ibiyaga bigari Tanzania n’u Burundi bitari kuri iyo gahunda.

Iri shami OMS ry’umuryango w’abibumbye rivuga ko izo ari doze miliyoni 336 z’inkingo za AstraZeneca/Oxford na Pfizer-BioNTech, zizatangwa mu gihembwe cya mbere n’icya kabiri by’uyu mwaka wa 2021.

Muri iki kiciro, ibihugu bizahabwa doze zingana na 3.3% by’abaturage ba buri gihugu kiri muri iyo gahunda, bigendanye n’intego y’ihuriro ry’inkingo ku isi GAVI yo gukingira 3% by’abatuye isi mu mezi atandatu ya mbere ya 2021.

Hari ibihugu bitari muri iyi gahunda

Ku rutonde rw’agateganyo rwashyizwe ahagaragara n’Ishami ry’umuryango w’abibumbye ryita ku buzima ku isi (OMS/WHO) rw’uko ibihugu bizakira inkingo, muri aka karere duherereyemo Tanzania n’u Burundi ntibiriho.

Muri Africa, Equatorial Guinea, Eritrea, Gabon, Lesotho, Madagascar na Seychelles nabyo ntabwo biri kuri uru rutonde rwatangajwe. OMS ivuga ko ibihugu bitari ku rutonde rwatangajwe rw’ibizahabwa inkingo byiguriye inkingo ubwabyo, ntibyazisabye, cyangwa se ntibirashyirwa mu bazazihabwa.

Nkuko BBC n’ibitangazamakuru byo muri Tanzaniya bibitangaza, mu cyumweru gishize, Perezida John Magufuli wa Tanzania yaburiye abategetsi kutakira inkingo kuko zishobora gutera ibibazo abaturage, nubwo nta bihamya ibyo avuga yerekanye.

Nyuma yo kongera kubona abanduye Covid, mu minsi ishize Leta y’u Burundi yatangaje ibikorwa byo kurwanya Covid-19, birimo gufunga imipaka yo ku butaka n’amazi, no kwambara agapfukamunwa ahahurira abantu benshi.

Doze ibihugu byo muri aka karere biteganya kuzabona ni:

  • DR Congo: 6,948,000
  • Kenya: 4,176,000
  • Rwanda: 1,098,960
  • South Sudan: 864,000
  • Uganda: 3,552,000

Kuki hari ibihugu bitazafata inkingo?

OMS yatangaje ko hari ibitazwi neza bishobora guhungabanya kugeza no gukingira izi nkingo mu bihugu. Muri ibyo ivugamo; Ubushobozi bwo gukora ingano ikenewe, kuboneka kw’amafaranga yo kuzigura, cyangwa kuba ibihugu ubwabyo byiteguye neza guhita bitangira gukingira Covid-19″.

Bimwe mu bihugu bikize mu minsi ishize byanenzwe n’ukuriye iri shami rya ONU rishinzwe ubuzima, gucuranwa no kwigwizaho (gutumiza) inkingo nyinshi z’iki cyorezo mbere y’ibikennye.

Ibihugu bikize byashyigikiye umugambi wa Covax wo gukusanya arenga miliyari $2 yo kugura no gutanga mu buryo budasumbanya inkingo za Covid-19 ku isi. OMS ivuga ko gutangaza uru rutonde rw’agateganyo rw’uko ibihugu bizahabwa inkingo bigamije guha amakuru za leta no kuzifasha kwitegura gahunda yo gukingira.

Minisiteri y’ubuzima mu gihugu cy’u Rwanda iherutse gutangaza ko inkingo za mbere mu byumweru bibiri biri imbere.

Integonziza@gmail.com

 

 

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *