Muri Mali, abasirikare bihaye imyanya ikomeye muri guverinoma nshya

Bah Ndaw, Perezida w’inzibacyuho wa Mali, yashyizeho guverinoma y’abaminisitiri 25, muri yo abasirikare bakuru bafashe imyanya myinshi ikomeye.

Abasirikare binjiye muri goverinoma ku bwinshi (photo net)

Mu iteka rya perezida ryasomewe kuri televiziyo ya leta ya Mali, minisiteri y’ingabo, iy’umutekano, iy’ubutegetsi n’iy’ubwiyunge zahawe abakoloneri bo mu gisirikare.

Inkuru dukesha ibinyamakuru byo mu gihugu cya Mali, zivuga ko ukuriye agatsiko k’abasirikare kahiritse ubutegetsi ni we ubwe watoranyije Bwana Ndaw nawe wabaye mu ngabo zirwanira mu kirere ngo aze abe perezida.

Nyuma yo gushyiraho minisitiri w’intebe w’umusiviri, umuryango w’ibihugu byo mu burengerazuba bwa Afurika, ECOWAS/CEDEAO, biteganyijwe ko ukuraho ibihano byari byarafatiwe Mali nyuma yo guhirika ubutegetsi mu kwezi kwa munani uyu mwaka.

Uko imyanya yigabanijwe n’ingabo

Umusirikare Col Sadio Camara, umwe mu bari bakuriye agatsiko kahiritse ubutegetsi, yagizwe minisitiri w’ingabo, naho uwari umuvugizi w’ako gatsiko Col-Maj Ismaël Wagué yagizwe minisitiri w’ubwiyunge.

Gusa nubwo hari ingabo nyinshi zinjiye muri guverinoma hari imyanya imwe ikomeye yahawe abasiviri, nk’aho uwahoze ari umushinjacyaha mukuru Mohamed Sidda Dicko yagizwe ukuriye ubucamanza.

Ikindi ni uko imyanya ine muri guverinoma ni yo yahawe abagore, ibiri ni yo yahawe abo ku ruhande rutavuga rumwe na leta rwitwa M5, ari narwo rwayoboye imyigaragambyo yatumye abasirikare bahirika Perezida Ibrahim Boubacar Keïta.

Mporebuke Noel

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *