Museveni amaze gutangazwa ko yatsinze amatora, Bobi Wine arabihakana

Komisiyo ishinzwe gutegura amatora muri Uganda imaze kwemeza ko Perezida Yoweri Museveni yatsinze amatora yo ku wa 14 z’uku kwa mbere 2021, ku majwi 58.64 %.

Iyi komisiyo itangaza ko Museveni yabonye amajwi 5.851.037, ni ukuvuga 58.64 % y’abatoye bose.

Mukeba we bari bahanganye, umuhanzi Robert Kyagulanyi, uzwi nka Bobi Wine, aza ku mwanya wa kabiri n’amajwi 3.475.398 ni ukuvuga 34.83 % y’abatoye.

Hagati aho, Bobi Wine ejo yari yatangaje ko atemera ibyavuye muri aya matora nk’uko byarimo bitangazwa na komisiyo ishinzwe gutegura amatora. Avuga ko yiteguye gutanga ibyemeza ko amajwi yibwe. Komisiyo ishinzwe gutegura amatora yo ihakana ko nta bujura bwabaye.

Mu bandi bahatanye na Museveni, Amuriat Oboi Patrick wo mu ishyaka Forum for Democratic Change (FDC) yabonye amajwi 310,753 ni ukuvuga 3.29%.

Naho komisiyo ishinzwe gutegura amatora, itangaza ko abatoye bose hamwe ari 9.978.093, ni ukuvuga 57.22 % y’abari biyandikishije kuri rupapuro rw’itora.

Ibi bisobanura ko 40% by’abari biyandikishije ku rupapuro rw’itora batitabiriye ayo matora. Aya matora ahaye manda ya gatandatu uyu mukuru w’igihugu w;imyaka 76 umaze imyaka 35 ayoboye iki gihugu.

Yoweri Museveni yageze ku butegetsi mu 1986 akavuga ko ari ikimenyetso cy’ituze mu gihugu. Ku ruhande rwa Bobi Wine w’imyaka 38 avuga ko ashyigikiwe n’urubyiruko cyane, dore ko igihugu kigizwe ahanini n’abakiri bato.

Mu gihe komisiyo ishinzwe gutegura amatora muri Uganda yari irimo gutangaza ibyavuye mu matora, Bobi wine yatangaje ko igisirikare cya Uganda cyari cyagose agace atuyemo.

Gusa umuvugizi wa Leta ya Uganda yamushinje gukabya inkuru ngo kugira ngo abantu bamugirire impuhwe.

Mporebuke Noel

 

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *