Covid-19: Abayirwaye bongera kuyandura hashize nibura amezi atanu

Ubushakashatsi bwakozwe n’ikigo Public Health England bwagaragaje ko benshi mu bantu barwayeho Covid-19 baba bakingiwe kongera kuyandura mu gihe nibura cy’amezi atanu.

 

Kuba warigeze kurwara Covid-19 bituma ugira amahirwe agera kuri 83% yo kutongera kuyandura, ugereranije n’ababa batarigera bayirwara, nk’uko abahanga babigaragaza.

Gusa ibi ntibikuraho ko hari abantu bongera kwandura Covid-19 kandi bakananduza abandi.

Kubera iyo mpamvu abategetsi ba leta zitandukanye barasabwa gukomeza gushishikariza abantu kwubahiriza amabwiriza yo kuguma mu ngo zabo-baba barigeze cyangwa batarigeze kwandura iki cyorezo.

Ibyo ubushakashatsi bwashimangiye

Umwarimu wa kaminuza ya Susan Hopkins, yari ayoboye  ubu bushakashatsi, avuga ko ibyavuyemo bitanga ikizere, avuga ko ubudahangarwa bumara igihe kirekire gusumba uko abantu babitekereza, ariko agashimangira ko kwikingira aricyo gisubizo kiruta ibindi.

Avuga ko byabateye impungenge cyane kubona hari abongeye kwandura Covid-19, aho babasanzemo icyorezo kiri ku rugero runini cyane, n’iyo baba batagaragaza ibimenyetso, kandi bakaba bashobora no kwanduza abandi.

Yagize ati: “Ibi bisobanura ko nubwo waba wibwira ko wamaze kurwara iyo ndwara noneho ukaba ukingiye, umenye ko ufite amahirwe menshi yo kutongera kurwara cyane ariko biba bigishoboka ko wandura kandi ukanduza n’abandi”.

Mu Bushinwa hongeye gupfa uzize Covid-19

Ibyo biravugwa mugihe kuri uyu wa 14 Mutarama, Inzego z’Ubuzima mu gihugu cy’u Bushinwa zatangaje ko hari umuntu wahitanywe na Covid-19, mu gihe hari hashize amezi umunani nta mpfu nshya z’iki cyorezo ziboneka muri iki gihugu.

Mporebuke Noel

Facebook Comments Box
Sangiza abandi iyi nkuru................

Leave a Reply

Your email address will not be published. Required fields are marked *