Ishimwe Dieudonne uzwi cyane nka Prince Kid yasezeranye kubana byemewe n’amategeko na Iradukunda Elsa wabaye Miss Rwanda 2017. Aba bombi bamaze igihe bavugwa mu rukundo ariko bikaba byaragarutsweho cyane hagati mu mwaka ushize ubwo aba bombi bafungwaga.
Kuri uyu wa kane nibwo aba bombi bemeje urukundo rwabo bakora icyo amategeko abasaba basezeranira ku Murenge wa Rusororo kubana nk’umugabo n’umugore.
Iradukunda Elsa, yakoze benshi ku mutima ubwo yafungwa ashinjwa kubangamira iperereza ryakorwaga kuri Ishimwe Dieudonne wari ufunzwe akekwaho ibyaha bifitanye isano n’ihohoterwa rishingiye ku gitsina. Iradukunda yahise agirwa umwere n’urukiko ararekurwa benshi bamufata nk’uwashaka kwitangira uwo bakundana.
Nyuma yaho na Prince Kid yagizwe umwere ku byaha byose yari akurikiranyweho ahita afungurwa.
Amakuru menshi yasohotse nyuma y’icyo gihe niyo yemeje ko aba bombi bamaze igihe bakunda ari nako ku mbuga nkoranyambage benshi basaba Ishimwe Dieudonne, kutazuyaza kwitura uyu mukobwa ineza yamugiriye, na we agahamya urukundo rwabo babana nk’umugabo n’umugore.
